Nongpoh, Ïaïong 02
Ka National Hynñiewtrep People (NHP) Sengkmie ka la pynpaw ïa ka jingpynrem jur halor ka kynnoh bym shongnia jong ki dkhot ka CWC ba ki dkhot jong ka KSU ki dei kiba pynïap ïa ar ngut ki bar jylla ha Ichamati.
Ha ka kyrwoh ba la soi da u Bah Demaxstar L Kyllang, General Secretary ka NHP, ka la ong ruh ba ka jingkynnoh khlem ki jingpynshisha ka la pyndom bad pynkhie bitar ïa ki khun samla jong ka Bri U Hynñiewtrep da kaba ong ruh ba ka long thik kumba ai ding ïa u phlang uba la ïap bad dawa ba ka sorkar ka dei ban kem mardor ïa ki dkhot ka CWC kiba donkti ban pynsaphriang ïa ka shithi byrngem ban shim ïa ka jingim jong ki dkhot ka KSU, da kaba jer kyrteng ruh ïa u Gopal Dey kum uwei na ki nongpynshit bad pynïapher jaidbynriew.
Ka seng ka buh jingkylli ruh na ka sorkar jylla ba ka leh aïu halor ka jingshah pynïap dusmon u Bah Lurshai Hynñiewta ha ki bar jylla? Shaei ka hok kaba u dei ban ïoh namar la katta snem khlem ïohi dak eiei ba la ïoh kem ïa ki ‘riew thrang snam kiba donkti ban shim ïa ka jingim ka jong une u dkhot ka KSU.
Shuh shuh, ka kyrwoh na ka seng ka kyntu ruh ïa ki bor pynïaid district ba kim dei satia ban ai jingbit ïa ka CWC ban pynlong ïa kino-kino ki jingïalang ne jingïakhih paidbah hapoh ka Bri U Hynñiewtrep ban lait na kano- kano ka thma jaidbynriew. Ha kajuh ka por ka seng ka maham ruh ïa u Gopal Dey bad ki dkhot ka CWC ba kim dei shuh ban dang pynmih ïa ki jingkynnoh khlem shongnia bad byrngem ïa ki nongïalam jong ka Bri U Hynñiewtrep naba kim dei kiba tieng pyut ïa kum kine ki jingbyrngem.
