Jowai, Ïaïong 02
U National General Secretary ka National People’s Party (NPP), Bah Sniawbhalang Dhar, uba dei ruh u Symbud Myntri Rangbah ka jylla, u la ong ba ki kam bah kiba u nongïalam rangbah jong ka Voice of the People Party (VPP) u la leh na ka bynta ka imlang-sahlang ka dei ka jingot kilo ïa ki mar rep bad ban pynduh jait ïa ki kynthei da kaba kwah ba ki khun kin shim jait na u kpa.
Ïa kane u Bah Sniawbhalang u la kren ha ka jingïalang ïalap ilekshon jong ka NPP kaba la long ha Indoor Hall ha Ladthadlaboh, Jowai ha ka Sngi Ba-Ar.
“U Bah Ardent u la kam ba u la leh bun bah ki kam na ka bynta ka imlang-sahlang. Hooid ka dei ka jingshisha namar kawei na ki kam bah jong u ka dei ka jingwanrah ïa ka ‘ot kilo’ ïa ki mar rep bad kawei pat ka dei ban pynduh jait ïa ki kynthei da kaba kwah ba ki khun kin shim jait na u kpa,” la kam u Bah Sniawbhalang.
U la ther tyngeh ruh ïa ka VPP kaba kat shaba ka leit ïalap ilekshon ka kynnoh ïa ki nongïalam bad ïa ka sorkar Meghalaya Democratic Alliance (MDA) ba ki long kiba bamsap.
“Haba kren dei ban pyrkhat janai ym dei ban kren kulmar kat shaba lap kat shaba shem namar ïoh ba poi ka por kan phai kylla,” u la ong.
U la pynpaw ruh ba u don ka jingngeit skhem ba ka Kong Ampareen Lyngdoh, kaba dei ka kyrtong ka seng NPP ha ka ilekshon MP Lok Sabha na Shillong Parliamentary Constituency, kan long ka nongjop lyngba ka jingkyrshan jong ki paidbah.
