Shillong, Ïaïong 02
U President ka KSU-South Khasi Hills District Unit, samla Ribok Diengdoh u la kyntu ïa ki nongshong shnong ka thaiñ Sohra, kumjuh ïa ki dkhot ka seng ban ïa mih paidbah ha ka Sngi Balang ban leit tur sha thanat Sohra halor ka jingshah kem jong 2 ngut ki dkhot ka seng ha ka miet Lah Sngi U Blei.
Kitei 2 ngut ki dei ba la tip kyrteng kum u Mesadapbor Skhembil bad u Shanborlang Shati ki la shah kem halor ka jingshah kynnoh donkti haba ïadei bad ka jingjia ha Ichamati.
“Ngi sngewthuh ba ka jingkdew kti jong ki pulit ka dei beit namar ka jingjia ha Ichamati. Ka jingong jong ki, ka dei tang ka jingjler suda namar lada ki ong ban shuh kylli jingkylli na ki, ym dei pat ba kin leit mynmiet-mynïong. Haei ju don aiñ ban leit kem mynmiet-mynïong, 1 baje ïa ki briew. Mynnin nga dang ïohsngew ba ha ïing jong ngi, ki leit 1:30…ki wad ïa nga” la ong u samla Diengdoh.
U la ong ruh ba ha ka jingshisha lada ki pulit ki kwah kylli jingkylli na ki dkhot ka seng, ki la dei ban ai da ka jingthoh bad phah wan mih ïa ki sha thanat.
Ha kajuh ka por, u la pynshai ba ym dei ba u sheptieng ne rieh, hynrei u la wan kiew sha Shillong ban pyndep la ki jong ki kam.
Haba kynnoh ba kane ka jingleh ka dei ka jingïuh roit ïa ki paradoh-parasnam, u samla Diengdoh u la ong, “Lashai ka sngi nga sngewthuh ba ki kmie ki kpa jong baroh ki dkhot ka South Khasi Hills ki dei ban mih bad kumjuh ki longkmie-longkpa naduh ka shnong Laitryngew, i Mei i Pa jong nga, ki hynmen ki para jong ngi, ki dei ban mih lashai ban leit sha thanat Sohra.”
Utei u samla nongïalam haba pynshai ba kim dei satia ki nongpynïap briew, u la pynpaw ka jingsngewkhia halor ka jingpyllait kyrteng ïa ki dkhot ka seng mar sien kem ïa ki, katba ïa kito kiba la ïohi pylleiñ-pylleiñ ha ka dur khih kiba ki shim ïa ka jingim jong u Bah Lurshai Hynñiewta, haduh mynta ym shym la ïohsngew, pynpaw kyrteng ne katno ngut la kem ïa ki.
“Kane ka dei ka kyrwoh kaba shai, ba lashai ka sngi hapoh 12 baje, ngan poi ha thanat Sohra, ki dkhot kiba shynrang mynsiem ki dei ban mih, ki kmie ki kpa kiba sngewthuh ïa ka khia ka shon kaba shah ñion beiñ na ka por sha ka por ha kum kine ki jait briew ngi dei ban mih nangne shakhmat,” u la ong da kaba bynrap, “Wat khang ïa ka lynti kaba ngan ïaid haduh ban da poi ha thanat bad ngin ïakren – kaei ka ban mih bad ban jia.”
U samla Diengdoh u la ong ruh, “Lada phi lah ban pyntikna lashai ka sngi ba nga-nga donkti, nga-nga dei u nongpynïap briew, phi dei ban pyntikna. Ngim donkti ha kata ka jingpynïap briew.”
Na ka liang u President u la ban jur ba ki pulit kim dei ban pynngat mukotduma ïa kitei kiba shah kem katba kim pat pyntikna mano ba donkti ha ka ban pynïap ïa ki 2 ngut ha Ichamati.
“Da kaba shu tharai, ban shu ong dei kita-kita, phin shu ngeit noh, phin hap wad jingtip haduh ban da lap bad lada lap ruh pynshitom ïa ki katkum ka aiñ. Ngin sa peit ha ki kyndon aïu ki pynngat ïa ngi. Lada phim don ïa ki sakhi ba biang, ngin sa peit kai, ngi na ka liang ka seng ruh ngi don la ka iktiar ba ngin leh na bynta jong phi ba shu thombor,” u la ong.
Shuh shuh u samla Diengdoh u la ïathuh ba naduh ba ïap u Bah Lurshai 4 snem kynthih, ka seng ka leit buh syntiew man u snem ha katei ka jaka (Ichamati) bad kam ju don kano-kano ka jingjia.
“Lada dei ba ngi pynïap briew, 4 snem kynthih ngi la wan, ym lah jia eiei naduh kitei ki sngi. Ngi tang shu dep ka kamram ngi la phet. Ngi kwah ba ki bor jong ka aiñ kin leh ïa kaba donkam pyrshah ïa ki briew kiba pynïap ïa u Bah Lurshai Hynñiewta. Sangeh noh ka kem naduh lashai ka sngi, nga la wan sha Sohra, wat kem ïa ki dkhot jong ngi.”
