Guwahati, ïaïong:
Kum ka jingpynkhreh na ka bynta ka ilekshon Lok Sabha, ka jylla Assam ka la pynkhlaiñ bha ïa ka jingpyntreikam namar ka la lah ban sei madan ïa 35 ngut ki kyrtong ki ban sa ïakhun na san tylli ki Parliamentary konstitwensi ha ka bynta kaba nyngkong jong ka jingthep vote ha ka jylla ka ban sdang ha ka 19 tarik, Ïaïong.
Kumba la ïathuh ka tyllong khubor ba la phah da ka Department of Information and Public Relations (DIPR), la ong ba ha ka bynta kaba ïadei bad ka jingthep kyrteng la sakhi ba ha ka minit kaba khatduh ka la don ka jingweng kyrteng ha Jorhat Parliamentary konstitwensi, ha kaba ka la pynduna ïa ki nongïakhun sha ka 35 ngut. Ha kaba ïadei ba ka jingdon jong ki nongïakhun, la shem ba ka Kaziranga ka la paw ba ka la don bun ki kyrtong ban ïakhun ha kaba ki la don kumba 11 ngut, bud sa ka Sonitpur da 8 ngut ki kyrtong, ka Lakhimpur da 9 ngut, ka Dibrugarh da 3 ngut ki kyrtong bad ka Jorhat da 4 ngut.
Ka seng Bharatiya Janata Party (BJP) ka la pynshisha da kaba ong ba ka la pynïakhun ïa ki kyrtong ha baroh san tylli ki konstitwensi, katba ka Indian National Congress ha saw tylli, shuh shuh ka la ai jingkyrshan ïa u kyrtong jong ka Assam Jatiya Parishad (AJP) u Lurinjyoti Gogoi ha Dibrugarh. Shuh shuh la ïathuh ba ki kyrtong ki kynthup ïa u Myntri ka sorkar kmie u Sarbananda Sonowal ha Dibrugarh, u Pradan Baruah ha Lakhimpur, bad u Gaurav Gogoi uba la mihkhmat na ka seng Congress ha Jorhat.
