New Delhi, ïaïong:
Ka Myntri jong ka Delhi ka Atishi Marlena ha ka Sngi Ba-ar ka la pynshisha ba ka seng Bharatiya Janata Party (BJP) kan sa kem shuh sa ïa kumba saw ngut ki nongïalam jong ka seng Aam Aadmi Party (AAP) ha kine ki ar bnai ban wan shwa ka ilekshon Lok Sabha.
Ha ka jingai jingkren ha ka jingïalang bad ki nongthoh khubor, ka Atishi, kaba la pynïaid ïa ka seng AAP ha Delhi hadien ka jingshahkem jong u Myntri Rangbah u Arvind Kejriwal, ka la ong, “Ha kine ki ar bnai ban wan shwa ka ilekshon Lok Sabha, kin sa kem shuh sa saw ngut ki nongïalam jong ka seng AAP. Kin sa kem ruh ïa nga, ïa u Saurabh Bharadwaj, Durgesh Pathak bad u Raghav Chadha.
“Ka Atishi ka la ong ba ka seng BJP, kaba synshar kum ka sorkar kmie hynrei ka bym ïoh synshar ïa ka nongbah Delhi, ka la kyrmen ba ka jingkem ïa u Kejriwal kan sa pyntroiñ ïa ka seng Aam Aadmi Party”.
U heh nongïalam jong ka seng AAP u Arvind Kejriwal ha ka Lah Sngi U Blei u la shah phah sha patok haduh ka 15 tarik, Ïaïong ha ka Rouse Avenue Court ha kaba ïadei bad ka jingjia jong ka jingshah kynnoh donkti ha ka ban pyndkoh treikam hapoh ka tnat Excise ha Delhi.
Ka kynhun Enforcement Directorate (ED), kaba la kem ïa u Kejriwal ha ka 21 tarik, Lber, ka la kyrpad ban ïoh set 15 sngi namar ka jingbym ïatreilang jong une u dkhot ka seng AAP bad ka kynhun tohkit.
U Kejriwal u la long u Myntri Rangbah banyngkong eh u ban shahkem bad uba lai na ki heh nongïalam jong ka seng AAP u ban shahkem ha kaba ïadei bad ka jingshah kynnoh donkti ha ka kam bamsap.
