Nongstoiñ, Ïaïong 03
Ban nang kyntiew ïa ki kam ïalehkai kriket hapoh ka thaiñ West Khasi Hills District, uwei u samla uba la tip kyrteng kum u Wanteibok Lyngdoh u la seng syndon da ka klob shimet kaba u la ai kyrteng ka Lariwan Cricket Club.
Da kaba seng ïa kane ka klob, utei u samla uba long u trai u la angnud ban ïoh hikai bad pyntbit ha ki heprit bad ki samla ka dong ka thaiñ khnang ba kin kiew ha katei ka jait jingïalehkai khnang ban kin ïoh ïa ka lad ban paw pyrthei ha ki rynsan kiba heh jong ki lympung ïalehkai kriket la ka long hapoh ka District, Jylla bad ka Ri hi baroh kawei.
Ïa katei ka klob shimet jong utei u samla la ïoh ban pyllait paidbah ha ka 2 tarik mynta u bnai da ka jingïadonlang u Bah Mebanphira Swer, General Secretary ka West Khasi Hills District Circket Association, u Bah Financestar Snaitang bad kiwei kiwei ki para samla nongïalehkai kriket ka thaiñ.
Kum ka dak jong ka jingplie paidbah noh ïa katei ka Lariwan Cricket Club, la ïoh ruh ban pyllait ïa ka lama jong ka klob bad ïa ki kyndon treikam jong ka klob.
U Bah Mebanphira Swer haba ai jingkren u la ong ba ka jingïalehkai kriket ka dei kawei na ki jingïalehkai kaba lah ban plie lad ïa ki khun samla ban paw pyrthei namar ha kane ka jingïalehkai dang duna palat ki samla ki ban mihkhmat na ki district sha ka Jylla bad tang ha ki jingïalehkai kiba hapoh ka Jylla ka jingsiew ïa ki nongïalehkai kam dei kaba duna.
U samla Wanteibok Lyngdoh uba la seng ïa katei ka klob, u la ong ba ka jingthmu bad ka jingangnud ka jong u ban seng ïa katei ka klob ka long ban kyntiew ïa ka jingïalehkai kriket hapoh ka thaiñ naduh kiba dang khynnah bad kumba long mynta ka dang duna hapoh ka thaiñ ban kyntiew ïa ki khynnah la ka long ha sor ne ha nongkyndong ha kaba ïa dei bad ka kriket.
Shuh shuh u la ong ruh ba u khmih lynti ba ka jingdon jong kane ka klob kan plie ka lad ka lynti ïa ki khynnah hapoh ka thaiñ.
Une u samla u la ong ruh ba haba phai sha ki bynta ka West Khasi Hills District, ka jingïalehkai kriket ka lah kiew bha mynta hynrei ka jingduna ka long ka jinghikai ïa kiba na nongkyndong ne ha sor ka duna. Kumta u la kyntu ïa kiwei ruh ba kin mih shakhmat ban ai jinghikai ïa ki khynnah jong ka thaiñ namar ka kriket hapoh ri India ka don bha shibun ka lad wat ha ka jingsiew.
