Shillong, Ïaïong 03
U Cristiano Ronaldo u la ïoh ban khur ar sien lynter ïa ki hat-trick ha kaba ka Al-Nassr ka la lah ban pynjem khnap ïa ka Abha da 8-0 kol ha ka Saudi Pro League kaba la long ha ka sngi Balang.
Utei u khlur ïalehkai shakhamt bad uba la khur san sien ïa ka khusnam Ballon D’Or, ym tang ba u la lah ban thep lai kol, hynrei u la lah ruh ban noh synñiang da kaba ïarap pynbuh bol ar sien ha ka kylla step na ka bynta katei ka kynhun kaba la khur ïa ka lahduh na Saudi Arabia haduh khyndai sien.
Kane ka jinglah ban pynpaw ïa ka jingtbit ka la pynlong ïa u Ronaldo ban khur ïa ka hat-trick hadien lai sien ha kane ka aïom, kata hadien ka jingjop ïa ka Al-Tai da 5-1 kol ha ka sngi Saitjaiñ.
Lyngba kane ka jinglah ban ïalehkai ka la pynlong ïa utei u khlur ïalehkai na Portugal ban long kum u rangthep kol ba kynsai ha kaba u la lah ban thep 29 kol.
Kumba ka paw na katei ka jingïakhun, ki rangïalehkai ka Al-Nassr ki la lah ban pynpaw ïa ka jingtbit naduh kaba sdang ha kaba u Ronaldo u la ïoh ban thep ar kol ha ka minit kaba 11 bad 21.
Hadien shiteng kynta kane ka kynhun ka la pynbiang ïa ka kol kaba lai lyngba u rangïalehkai na Senegal u Sadio Mane. Hashwa ban kut ka jingïalehkai joing ka kylla step, u Ronaldo u la khur syndon ïa ka hat-trick da kaba thep ha ka minit kaba 42 bad ïa kawei pat la thep da u Abdulmajeed Al-Sulaiheem (44).
Hadien katto katne ba la bteng ïa ka jingïakhun jong ka kylla miet, ka Al-Nassr ka la ïoh ban thep kol biang lyngba u Abdulrahman Ghareeb bad ïa kiwei pat ki ar kol la thep da u Abdulaziz Al-Aliwa (63 & 86) na ka bynta ban khur syndon ïa ka jingjop.
