Shillong, Ïaïong 03
Ïa ka 2nd North-East Regatta 2024 ba la pynlong da ka Umïam Sailing Club (USC) bad ka UDAY for Sailors Foundation ha ryngkat ka Yachting Association of India (YAI), ka la sdang ha ka Sngi Balang ha ka Umïam Sailing Club, Orchid Lake Resort, Watersports Complex, Shillong.
Ha kane ka sngi la ïadon lang u Chief Secretary ka Sorkar Jylla u Bah Donald. P. Wahlang (IAS) ha ryngkat u Director General of Police u L.R. Bishnoi, u Lt. General TSA Narayanan (Retd.), Vice President ka YAI, Bah Robert Lyngdoh uba long u Member Secretary ka Umïam Sailing Club, u Col. Alok Yadav, Technical Director ka 2nd North-East Regatta, Comde, kumjuh u Amit Shrivastav, HSG, YAI, Kong A. M. Tariang, Chief Financial Officer ka Meghalayan Age Limited, u Rajesh Chaudhary, uba la ïohpdiang teng ïa ka khusnam Arjuna lem bad kiwei.
Haba ai jingkren ha kane ka sngi u Bah Wahlang u la pynpaw ïa ka jingsngewkmen ba ïa ka jingïakob ñiah lieng la ithuh kum ka ‘national ranking event’ bad ka jingkhublei ka leit sha ki ophisar ka tnat shipai kiba la ai jingkyrshan ban pynlong ïa kane ka jingïakob na ka bynta ban plie lad ïa ki nongñiah liang kiba dangkhynnah ba kin ïashim bynta ha kane ka jingïakob.
U la pynpaw ba ka Sorkar Jylla ka la thaw ïa katei ka klob hapoh ka tnat jngohkai da ka jingthmu ba ym tang ban pynlong ïa ki jingïakob ñiah lieng, hynrei ban pynlong ïa ka Jylla kum ka jaka jngohkai kaba itynnad.
U Member Secretary ka USC u Bah Robert Lyngdoh u la ïathuh ba ha kane ka prokram ki la don da ki spah ngut ki nongïashim bynta kiba la wan ban ai kyrteng na ka bynta katei ka jingïakob na 15 tylli ki klob kiba na kylleng jong ka ri.
Ha kawei pat ka liang u Vice President ka Yachting Association of India (YAI), u TSA Narayana u la ong ba ka synjuk ka la thmu ban pynlong ïa kane ka jingïakob ñiah lieng ha kylleng ki jylla jong ka ri kat kum ka sports code.
Kane ka jingïakob ñiah lieng kan kut haduh ka 6 tarik mynta u bnai, bad la khmih lynti ba kin don haduh 100 ngut ki nongïashim bynta ki ban wan na kylleng jong ka ri bad 106 ngut ki nongïashim bynta na ki 17 tylli ki klob.
