Nga la tieng eh ha kato ka miet, ïoh jia kumba jia ïa u Bah Cherish, ong ka Kmie u Ribok

La ïathuh ba ki la wan ban kylli beit ïa u Ribok, ka khun kynthei ka la ong ba u don sha Shillong.

Shillong, Ïaïong 03

“Nga la shu duwai Blei bad nga shu ong ba donbok ba U Blei u dang ieid ïa nga, namar da dei ba un leit don ha ïing tip shuh ki la ïaleh kumno, ïoh ki leh kumba leh ïa u Bah Cherish.”

Ïa kitei ki kyntien la ong da ka kmie jong u samla Ribokstar Diengdoh haba pynpaw ha ka jingïakren bad ki lad pathai khubor, ïa kaei kaba la jia ha ka miet jong ka jingwan khynra jong ki pulit ïa ka ïing sah ka jong ki.

“Ha ka por shiteng miet, nga la ïohsngew ïa ka jingtied ïing tangba ngam shym lah ban khyllie ïa ki khmat bad nga la ïohsngew ba ka jingtied ïa ka jingkhang ka la long kumba la thmu ban rat ïa ka ïing bad ha kata ka por la khie u khun shynrang uba la kren, bad ha kane ka khyllipmat, ka khun kynthei ka la hylla bad mai bad ong wat plie ïa ka ïing haba ki nongtied ïing kim kren,” la ong ka kmie u samla Ribokstar, uba dei u President ka KSU South Khasi Hills District.       

“Ynda ka khie, kan sa kren ka khun kynthei, bad da dei bym kren ruh imat la shu rat ïa ka jingkhang. Haba la plie ka jingkhang, ki la rung kumba 2 ne 3 ngut bad ki la kylli shano u Ribok. Nga ïohsngew, ki la phah tbeh ding, ki ïa rung sha baroh ki kamra bad wat sha jaka leit shabar, bad la don lypa ruh ki nongïeng nongap sha kyndong,” i la ong shuh shuh.

“Ki la wan wad beit ïa u Ribok, nga la shu duwai Blei, nga shu ong ba donbok ba U Blei U dang ieid ïa nga, da dei ba un leit don ha ïing tip shuh ki la ïaleh kumno, ïoh ki leh kumba leh ïa Bah Cherish, nga lei la tieng eh ha kato ka miet,” la bynrap ka kmie u Ribokstar.

La ïathuh ba ki la wan ban kylli beit ïa u Ribok, ka khun kynthei ka la ong ba u don sha Shillong. Haba ki la kylli u sah haei bad u don hangno? Ki la jubab ba kim don jingtip naba u ju leit sah sha ïing ki paralok sha Shillong bad kim don jingtip eiei.