Shillong, Ïaïong 03
Ka kynhun ki nongñiah saikil ka la wanphai ïing da kaba khur kawei ka takma ksiar bad lai tylli ki takma rupa ha ka jingïakob ñiah saikil ba la tip kum ka 20th National MTB Championship ha Panchkula kaba ha Haryana.
Ïa ka takma ksiar la khur da u Aaron Oniel Kharpuri ha ka Downhill Elite, katba ïa ka takma rupa la khur da u Taitus Ch Marak (Downhill Elite) bad u Kevin Lyngdoh u la lah ban khur haduh ar tylli ki takma rupa ha ka XCO Time Trial bad ka Mass Start. Ar ngut kiwei pat, kata u Lambormi Phawa u la wan ha ka kyrdan ba san ha ka XCO Junior Men category bad u Fabian Khyllait u la wan ba hynñiew ha ka XCO Youth Category.
Ïa kane ka jingïakob la pynlong da ka Haryana Cycling Association hapoh ka jingkhmih da ka Cycling Federation of India, kaba la sdang naduh 28 bad kut ha ka 31 tarik u Lber mynta u snem.
Ïa kane ka kynhun kaba don san ngut ki nongñiah saikil la ïalam da u President ka Meghalaya Cycling Association u Bah Lening S. Bareh bad u Secretary ka West Jaiñtia Adventure and Cycling Association u Bah Lanlifni Lamare.
Katei ka lympung ka la long kaba kham eh bha namar ka jingïakob ka la long ha ki jaka ba kham eh jong u lum Morni, Panchkula bad la sakhi ïa jingwan ïashim bynta da ki nongñiah saikil na kylleng jong ka ri.
Wat hapdeng kine ki jingeh, pynban ki nongñiah saikil ka Jylla ki la lah ban pynpaw ïa ka jingtbit bad ka long ka sien kaba nyngkong eh ba ki la lah ban kynjoh sha ka thong namar ka MCA ka la lah ban pynlong ïa ki prokram jinghikai kumba katto katne taïew shwa ba kin mih ban leit iashim bynta.
Kumta na ka liang kane ka synjuk ka la pynpaw ka jingsngewkmen halor ka jinglah ban pynpaw ka jingtbit da katei ki nongñiah saikil ka Jylla bad ka la khmih lynti ban kin nangjam shaphrang ha kiwei pat ki jingïakob.
Ha kajuh ka por ka synjuk ka la pynpaw ka jingsngewsarong halor ar ngut ki nongñiah saikil kata u Taitus Ch Marak bad u Aaron Oneil Kharpuri, kiba la don hapoh ka thup na ka bynta ka Asian Continental MTB Championship ka ban long ha Malaysia naduh 8 haduh 12 tarik u Jymmang mynta u snem.
