Shillong, Ïaïong 03
Ka Juventus ka la pynliem noh ïa ka Lazio da 2-0 ha ka semi final (first leg) jong ka lympung ïalehkai Coppa Italia. Kane ka wan urlong hadien ba u Federico Chiesa bad u Dusan Vlahovic ki la lah ban thep kol na ka bynta ka kynhun u Massimiliano Allegri ha ka kylla miet.
Kane ka jingjop ka la long ka jingkyrmen ïa ka Juventus ban nang jam sha ka final ha ka sien kaba 22 jong kane lympung kaba ka la khur ïa ka rekod jingjop haduh 14 sien. Ïa ka wat kaba ar yn pynlong ha ka 23 tarik mynta u bnai ha Rome.
Ha ka jingshisha ka Juventus ka la dei ban ïoh pynkhih jar nyngkong eh ha ka kylla step hadien ba ka la ïoh ban shut ïa ka penalty na ka daw ba u Matias Vecino u la shah pynur ha u rangïalehkai ‘dien u Andrea Cambiaso. Hynrei hadien ka jingbishar bniah lyngba ka VAR u rephri u la kylla ïa la ka rai da kaba ong ba ka kabu ksiar ba la ïoh da u rangïalehkai ka Juvetus ka dei ka ‘offside’.
Ka Lazio, kaba la duh noh ïa u rangthep kol ba kynsai u Mattia Zaccagni ha ka minit kaba 14, ka la pyrshang ban ïakhun tyngeh ha ka kylla step ha kaba ki la ïoh ïa ki kabu kiba biang, pynban kim shym la lah ban thep.
Hynrei ka Lazio kaba la jop ha ka sngi Saitjaiñ ia ka Juvetus da 1-0 kol ha la ïing ha ka lympung Serie A, ka la ïakynduh eh na ka daw ba ka la shah thep kol kylla ha ka Juventus lyngba u Chiesa hadien san minit ba la bteng ïa ka jingïakhun jong ka kylla miet.
Hadien katto katne por ka Juventus ka la ïoh ban thep biang ïa ka kol kaba ar lyngba u Vlahovic ha ka minit kaba 64 na ka bynta ban tam da 2-0 kol.
“Ka long ka por kaba eh bha ïa ngi baroh, watla ngi tip ba ngi hap ban ïakhun tyngeh,”la pynpaw u Vlahovic hadien ba la kut ka jingïalehkai.
“Ngi la ïakhun tyngeh kum ka kynhun kaba khlaiñ bor ha ryngkat u coach uba biang pura. Ngi la lah ban pyni ïa ka jingkhlaiñ bor da kaba ngi la lah ban thep kol ïa ka liang pyrshah.”
