Shillong, Ïaïong 03
Katba ki sngi bad ki por ki la nang jan sha ka sngi thep ‘vote’ ïa ka ilekshon MP shapoh ka ïingdorbar ka Lok Sabha ka ban sa long ha ka 19 tarik u Ïaïong 2024, la ïohi ba katto-katne ki seng saiñpyrthei ki la ai ïa ka jingkyrshan sha ki seng kiba ki ïa monlang bad kumjuh ka jingleit pynïasoh na kawei ka seng saiñpyrthei sha kawei pat.
La ïohi ba ka seng Bharatiya Janata Party (BJP) ka la ai jingkyrshan ïa ka seng National People’s Party (NPP) na ka bynta ka kyrtong, ka Dr. Mazel Ampareen Lyngdoh katba ka Hill State People’s Democratic Party (HSPDP) pat ka la ïatreilang bad ka United Democratic Party (UDP) hapoh ka shatri jong ka Regional Democratic Alliance (RDA) na ka bynta u kyrtong, Bah Robertjune Kharjahrin.
Ha kaba ïadei pat ka Khun Hynñiewtrep National Awakening Movement (KHNAM), wat la ka la rai ba kan nym sei satia ïa u kyrtong ban pynïakhun ha kane ilekshon MP hynrei kane ka seng ka la rai ban leit ai ka jingkyrshan sha kiwei pat ki seng.
U Working President jong ka Khun Hynñiewtrep National Awakening Movement (KHNAM), u Bah Thomas Passah u la ong ba ka seng ha ka 3 tarik bad ha ka 4 tarik u Ïaïong 2024, kan sa leit ban ïakynduh ïa baroh ki kyrtong ki ban aireng ha kane ka ilekshon ha ryngkat ka jingrah ïa ki mat kiba ka seng ka don bad lada kino-kino ki seng ki pdiang ïa ki mat kiba ka KHNAM ka rah ha ki, ka seng da kawei ka jingmut kan ai jingkyrshan ïa kata ka seng.
“Ngin ïakynduh shwa ïa ki kyrtong namar ngi hap ban rah ïa kine ki mat jong ngi kiba ngi mut ban pynsngew ha ki namar lada ngi kyrshan ïa ki, ki hap ban pdiang ïa kine ki mat jong ngi kein”, la ong u Bah Thomas. U la ong ba ynda ka seng ka la dep ban leit ïakynduh ïa baroh ki seng bad ki seng jong ki, ka seng kan sa pyntip sha ki lad pathai khubor ïano kan ai jingkyrshan ha kane ka ilekshon MP.
