Shillong, Ïaïong 03
Kawei na ki seng ki Hindu kaba pawkhmat ïa kaba la tip kum ka Vishva Hindu Parishad (VHP) ha ka 2 tarik Ïaïong ka la kyrpad ïa ka President jong ka Ri India, ka Droupadi Murmu, ban tuklar halor ka jingshah pynïap jong ar ngut ki bar jylla ha Ichamati bad Dalda ha East Khasi Hills, Meghalaya, ka 27 tarik Lber bad ka la dawa ruh ba dei ban phah tohkit ha ki kynhun tohkit jong ka Sorkar Pdeng.
Ha ka shithi sha ka President, u Secretary General ka VHP, u Bajrang Bagra u la kam ba kitei ar ngut ki bar jylla ki la shah pynïap dusmon ha Ichamati hadien ba la wai kawei ka jingïalang ban pyrshah ïa ka aiñ Citizenship Amendment Act.
U la ong ruh ba ha ka jingshisha, ka East Khasi Hills district, kaba ka shnong Ichamati ka hap, ka dei ka district kaba la lait na ka CAA namar ka dei kaba don hapoh ka khyrnit kaba hynriew jong ka Riti Synshar. Hynrei u Bagra u la ong ba dei ha kane ka jaka ba ar ngut ki briew kiba dei ki Hindu ki la shah pynïap ha ki runar ki bym lah ban tip.
Namarkata, ka VHP ka la kyntu ïa ka President ba kan tuklar halor katei ka jingjia bad ha kajuh ka por ka VHP ka la kyrpad ba dei ban phah tohkit bniah ha ka CBI lane NIA bad ban kem ïa kito kiba donkti.
Shuh shuh ka VHP ka la dawa ba ïa ka mukotduma halor katei ka jingjia dei ban bishar da ka Special Court khnang ba yn lah ban ïoh ïa ka jingbishar ba hok kham kloi. La ong ruh ba ki bahaïing hasem jong kitei ar ngut kiba la shah pynïap ki dei ban ïoh ïa ka bailutksan, ka kam ka jam bad ki lad jingïada.
Nalorkata, u Bagra u la kyntu ïa ka President ban pynthikna ba ki bor ba dei khmih kin leh ïa kaba donkam mardor khnang ban pynthikna ba baroh ki rit paid ha ka thaiñ kin don hapdeng ka jingshngaiñ bad ban teh lakam ïa ki ‘riewshimet bad ki kynhun kiba leh be-aiñ.
La dawa ruh ba dei ban pynshitom ïa kito ki briew jong ka sorkar kiba la ailad ban pynlong ïa ka jingïalang pyrshah CAA wat la dep ban pynjari ïa ki kyndon kiba ïadei bad ka ilekshon lane ka Model Code of Conduct.
