Taipei, Iaïong:
Ka tnat ïada jong ka Taiwan ka la pyntip ba kumba 30 tylli ki liengsuiñ thma ka China ki la leit ban syntiat bad her tawiar sawdong ia ka Taiwan ha ka Sngi Balang baroh shisngi- shimiet.
Katba ka China pat kam shym la pynphai ktien ne kren eiei halor katei ka jingleit phah syntiat ia ki liengsuiñ thma sha katei ka ri dew lynnong (Taiwan) kaba ka China ka ju kam trai man ka por ba katei ka dew lynnong ka long ka bynta kaba shu pait na ka China bad ba kan sa pyniasoh biang sha lade ha kano-kano ka por katba ka sngew bit bad sngew donkam ban leh kumta.
Ka tnat ïada jong ka Taiwan ka la iathuh ruh ba kumba 20 tylli kitei ki liengsuiñ ka China ki la leit ban rung shaduh sha ki bynta jong katei ka ri kaba la hap hapoh ka ‘Air Defence Identification Zone’ (ADIZ).
Nalor kata, la ong ba ki tnat shipai jong ka Taiwan ruh ki la peit thuh bad bishar bniah bha halor katei ka jingleit syntiat bad jingleit rung bad jingleh don bor jong ki liengsuiñ ka China ha katei ka sngi wat la kam long shuh kaba sngewphylla ban iohi ne sakhi ia katei ka jingleh jong ka China.
Kum ban pynkynmaw dang mynshem bnai, la ong ba ka Taiwan ka la lap haduh 36 tylli ki liengsuiñ thma ka China kiba leit syntiat bad ker tawiar ia ka Taiwan haduh shisngi- shimiet.
Kane ka jingleh jong ka China ka long hadien ba katto-katne ki heh saiñ pyrthei bad ki ‘riew shemphang ki la dep kren lypa halor ka jingma kaba ap ia ka Taiwan na ka thma jong ka China bad kaba lah ban khie ha kano-kano ka por bym lah ban tip.
Shuh shuh ruh la ong ba ka China ym tang ba ka ju phah syntiat ia ki liengsuiñ thma na ka por sha ka por, hynrei wat ka jingleit pynher ia ki kynja balun kiba her kum ki parachute ka la jur bha ha kine ki sngi. Ktei ki kynja balun ki ju leit swait bad iaid lyngba ia ka Taiwan khnang ba ka China kan ioh peit thuh ia ka jinglong- jingman kylleng sawdong jong katei ka ri dew lynnong kaba rit.
Namar la ong ruh ba ka China kam sngewtynnad ia u nongialam bathymmai jong katei ka dew lynnong Taiwan- u Vice President Lai Chingte bad uba dang shu dep jop ia ka ilekshon ha ka 13 tarik u Kyllalyngkot 2024.
La ong ruh ba ka Taiwan ka long kawei na ki mat ba u President ka United States- u Joe Biden, u la iakren bad u nongialam ka China- u Xi Jinping ha ka jing-iakren lyngba ka ‘phone’ ha ka Sngi Ba-ar, bad na liang ka White House ruh ka la pyntip ba u Biden u la ialeh ban kyntu ia u Xi ba um dei ban pynthut ia ka shongsuk-shongsaiñ ha katei ka ri dew lynnong Taiwan bad ka China ka dei ban pynneh ia ka jingiadei bad ki para ri ba marjan na ka bynta ka jingshngaiñ lang jong baroh ki ri ka pyrthei.
