Jowai, Ïaïong 04
Naduh mynshwa la dep maham lypa ba ka NPP bad ka BJP ka dei kajuh bad mynta ka la shai kdar namar ba ka BJP ka la randien ban pynïeng kyrtong ha Meghalaya bad ka la kyrshan ïa ka NPP.
Ïa kane la ong da u MLA ka Mawlai Bah Brightstarwell Marbaniang haba kren ha ka jingïalap ilekshon kaba la long ha ïew Raliang, West Jaiñtia Hills District ha ka Sngi Palei.
Haba bteng ïa ka jingkren, u Bah Marbaniang u la ong, ka BJP ka la tip shai ba lada ka ïakhun dalade ha Meghalaya kan rem. Kumta ka la riam noh ha ka dur jong ka NPP ban ïakhun ïa ka ilekshon MP bad kumta lada ki paidbah ki jied ïa ka NPP ka mut ba ki jied ïa ka BJP.
U la ong ruh ba ka BJP ka thmu ban pynlong kawei ka ri kawei ka ktien kawei ka niam, hynrei ka la klet noh ba ka jingitynnad bad jingbhabriew jong ka Ri India ka dei ka jingïatylli lang hapdeng ki jingïapher kiba bun ne kumba ong ha ka ktien nongwei ‘Unity in Diversity’.
U MLA ka Mawlai u la ong ha u snem 2019-20 ka la don ka jingïakhih ILP bad CAB kaba jur ha Meghalaya bad ka Sorkar MDA-I ka la phah ïa ka resolution sha ka Sorkar Kmie ban pynpaw ïa ka jingpyrshah ïa ka CAB hynrei ha Parliament ha Delhi pat ka MP na Tura ka Agatha Sangma kaba long ka para trai u Conrad K Sangma, u Myntri Rangbah ka Jylla ka la pynpaw ïa ka jingkyrshan jong ka NPP ïa ka CAB.
Haba kynthoh pat ïa ka Congress, u Bah Brightstarwell u la ong ba ka Congress ka la synshar bun snem ha Delhi bad na ka daw ba ka pulom, kumta ka la ïeng rasong ka BJP.
U la ong ba u MP ba mynta ka Shillong u Bah Vincent H Pala um shym la leh kino-kino ki kam kiba khraw ne kiba myntoi ïa ka konstituensi bad ka jylla hi baroh kawei.
Ha kaba ïadei bad ka UDP bad HSPDP u la ong, ka dei tang ka seng ai ding ïa ka Sorkar MDA ha ka jingïalam ka NPP.
