Nongstoiñ, Ïaïong 04
Ka Hynñiewtrep Youths’ Council (HYC) West Khasi Hills District bad ka HYC Ri Mulliang Circle, ka kyntu ïa ka tnat MeECL ba kan shim khia ban siew bai lutksan ïa u heprit uba la mynsaw na ka jingshah bat bording na u sainar ilektrik kaba la jia ha ka shnong Langja ha West Khasi Hills.
Halor katei ka bynta, ka HYC hapoh ka jingïalam u samla Lumlang Kharsyiemlieh, President bad samla Disterborlin Wanniang President Ri Mulliang Circle ka la leit ïakynduh ïa u Executive Engineer (EE) Meghalaya Energy Corporation Limited (MeECL), West Khasi Hills District ban ïakren halor katei ka bynta.
Ki nongïalam ka HYC, ki la ïathuh ha katei ka jingleit ïakynduh ïa u EE ka MeECL, na ka liang ka seng ka la kyrpad ban ïarap halor ka jingshah bat bording u heprit Isboklang Wanniang na shnong Langja, West Khasi Hills District.
“Sngewbha ban ïarap lem ban pynïoh bai lutksan halor ka jingshah bat ha u sainar bording ïa u heprit Isboklang Wanniang na ka shnong Langja haduh ba u la mynsaw jur kaba la jia ha ka 23 tarik u bnai Lber 2024 namar ba u tbian eh u sainar bording uba dei u laiñ heh ha katei ka jaka,” la pynpaw ki nongïalam ka HYC.
Ki la ïathuh ruh ba ka HYC ka la ban jur ïa ka MeECL ba kan shimkhia ban pynïoh ïa ka jingïarap ïa katei ka jingjia bad mynsaw jong utei u heprit.
Shuh shuh ki la ïathuh ruh ba ha katei ka jingleit ïakynduh, u EE u la kular ban shimkhia ïa katei jingjia bad ong ruh ba kin dang tip ïa katei hadien ba la ïohi ïa ka jingleit ïarap na ka HYC West Khasi Hills District.
Ha kajuh ka por, ka HYC ka la kyrpad ruh ba dei ban da leit jurip bha ha baroh ki laiñ hapoh ka West, dei ban ai shithi ruh ha ki nongïalam shnong ban peit lada ka i synjor dei ban ïathuh.
Nalor kane ka HYC ka la pynkynmaw ruh halor ka jingjulor jong ki post ilektrik ha Mawmarin bad halor kane ka bynta u EE u la ong ba kin sa peit bniah bad jurip ïa kiba duna kin leh lyngba ka skhim RDSS.
