Ka Dr. M. Ampareen Lyngdoh kaba long ka kyrtong MP na ka party NPP na ka Shillong Parliamentary Constituency ka don ka jingkyrmen ban jop lada ka sngewbha ban ai da ka jingkular paidbah lyngba ki kotkhubor Khasi ba kan ym pyndem ha ka BJP lada kan jop ha kane ka Election MP khamtam ha kaba ïadei bad kano-kano kaba ktah ïa ka jingsngew pyrshah ïa ki paid riewlum Khasi – Jaiñtia ne pyrshah ïa ka niam rit paid, ka niam Khristan ne Niam Khasi Tynrai ha ri Khasi – Jaiñtia ne kano-kano ka aiñ kaba ktah ïa ka rukom long trai ïa ka khyndew ka shyiap ha Khasi Jaiñtia.
Ka jingwan ai jingkyrshan ka party BJP ïa ka party NPP bad ïa ka Dr. Ampareen ka long kumba la wan kah da ka syrngiew jong ka BJP ïa ka dur ba shisha jong ka. Ki paidbah ki tieng ïa ka Hindutva ideology jong ka party BJP.
Ki paidbah ba bun ki tip lut ïa ka Dr. Ampareen Lyngdoh namar ka la long ka MLA la bun bun snem. Ka la ju long Minister la bunsien bad mynta ruh ka long ka Minister jong kane ka sorkar Meghalaya. Ka dei ka khun jong u (Late) Bah Peter G. Marbaniang, uba ju long MLA bad MP ruh.
Nga itynnad shibun ïa ki briew kiba ju mih bujli ha ka jaka jong u kpa, ki nong Mawiang jong ngi ki ju ong ‘U Kpa u Sewbeh, u Khun ruh u Sebeh’ ka jingbatai kamut ba u kpa u long uba tbit ha kano-kano ka kam ba u trei, u khun ruh u long uba tbit ha kata ka juh ka kam ba u kpa u ju trei.
Ka Dr. Ampareen ruh ka la long kumta ka la mih bujli ha ka jaka jong u kpa, u long u ‘riew saiñ pyrthei uba tbit bad uba ïoh jingieit na u paidbah, kyrmen ba ka Dr. Ampareen kan sa jop ha kane ka election MP lada kan ai jingkular kaba shai ha u paidbah ba nym long ñiangkoh-nguh ka BJP. Haduh mynta ki paidbah ka ri Khasi – Jaiñtia kim pdiang ïa ka party BJP.
Dr. Boss L. Marthong
