Jowai, Ïaïong 04
Ka shlem treikam jong u District Sports Officer (DSO), West Jaiñtia Hills kan pynlong ïa ka lympung ïalehkai ‘District Level Inter School Athletic Meet 2024’ na ka bynta ki khynnah skul shynrang bad kynthei ha ka kyrdan Under-14, Under-16 bad Under-18.
Kane ka lympung ïalehkai jong ki khynnah skul kan sdang naduh ka 1 tarik haduh 3 tarik u Jymmang mynta u snem ha Kiang Nangbah Stadium, Jowai.
Ka jingot snem na ka bynta ka Under-14 ka dei ïa kiba la kha shwa ka 30-11-2010 ne hadien ka 30-11-2012. Na ka bynta ka Under-16 ki dei ban long kiba la kha shwa ka 30-11-2008 lane hadien 30-11-2010 bad ka Under-18 kin dei kiba la kha shwa ka 30-11-2006 lane hadien ka 30-11-2008.
Ka tarik ban pdiang khatduh ïa ka jingpynrung kyrteng kan long ha ka 18 tarik mynta u bnai bad ka jingbishar bniah (screening) ïa ki khynnah kan long ha ka 24 tarik ha Kiang Nangbah Indoor Stadium Jowai naduh ka por 9 baje mynstep haduh 4 baje janmiet.
Ka jingïalang ki nonghikai bad kiba mihkhmat ïa ki skul kan long ha ka 25 tarik mynta u bnai ha ka por 1 baje nohphai sngi ha shlem treikam u DSO, Jowai. Ki skul kiba kwah ban ïashim bynta ha kane ka ‘District Level Inter School Athletic Meet 2024’ ki lah ban wan shim ïa ki form ha ka por long trei.
Baroh ki khynnah kin hap ban pynbiang ïa ki kot ki sla kum ka Original Adhaar Card, Birth Certificates ba ïoh na ka Municipal/CHC/PHC ha ka sngi ba bishar bniah ïa ka rta jong ki bad ban tyngkhap lang ïa ka Copy Birth Certificate ryngkat ka form.
Yn nym pdiang ïa kiba wan thep kyrteng thymmai ha ka sngi jurip rta. Donkam ruh kawei ka dur (passport size) ban bsuh lang ha ka form. Baroh ki khynnah ki dei ban wanrah ïa u Adhaar Card bad Birth Certificate. Na ka bynta kito ki khynnah kiba la register hapoh ka AFI-UID (lada don) ki lah ban phah lang ban pynshisha ïa ka rta jong ki.
