Jowai, Ïaïong 04
Ka Indian National Congress (INC) jong ka West Jaiñtia Hills District, ha ka Sngi Palei ka la pynlong ïa ka jingïalap ilekshon na ka bynta u kyrtong ka seng u Bah Vincent H Pala ha ka shnong Raliang.
Haba shim bynta ha ka jingkren, u MDC ka Jowai North, Bah Brighstar Chyrmang, u la maham ba lada ka Bharatiya Janata Party (BJP) ka wan biang ha ka bor ha Delhi khlem pep kan pyntreikam noh ïa ka Citizenship Amendment Act (CAA) ha ka Jylla Meghalaya. U la ong ba ka jingpyllait ïa ka Meghalaya na ka CAA mynta ka long tang ka buit ilekshon jong ka BJP khnang ban jop ïa ka ilekshon.
U Bah Chyrmang u la ong na ka daw jong ka jingbym pyllait ïa ka bhah khajna na ki mar poh khyndew da ka Sorkar Jylla sha ka JHADC, ki nongtrei bad ki MDC jong ka JHADC kim pat ïoh tulop la bun tylli ki bnai haduh mynta.
U la kyntu ïa ki paidbah ban jied biang ïa u Bah Vincent H Pala kum u MP jong ki namar ba u long u MP ba la kham tbit bad kumta u la ban ïoh ïa ka shuki Myntri ha kane ka kynti lada ka Congress ka wan phai sha ka bor.
U Bah Emlang Laloo, kyrtong ka Congress na ka 1-Nartiang Konstituensi ha ka ilekshon MLA ba dang shu dep, u la ong katkum ka jinglong-jingman ka saiñ hima sima ha ka Ri India, mynta ki don tang ar kynhun ka NDA kaba thmu pynduh pyndam ïa ka riti synshar bad ka synshar paidbah ne ka Democracy bad ka kynhun INDIA kaba ïakhun ban pynneh pynsah ïa ka riti synshar bad ka synshar paidbah.
Haba phai sha ka jinglong jingman ha jylla Meghalaya mynta, u Bah Laloo u la ong ba mynta tang ki ‘Super Level’ ki kamai ki pahuh katba kita ki High Level bad ki Medium Level ki la duh kam duh jam.
U la ong ba lada ka Congress ka wan biang ha ka bor, kan pyntreikam noh ïa ka Minimum Support Price na bynta ki mar rep khnang ba ki nongrep kin nym jynjar bad u la ai nuksa ruh ba ka dor jong u synsar ka hiar bha mynta bad ki nongrep kiba thung synsar ki ud ki lynñiar.
U la ong ba ki bun ki longkmie kiba ym don kurim ne ki Single Mother bad kumta lada jop ka Congress kan khmih ïa ka skhim kaba kyrpang ïa ki.
Katba u Chief Executive Member barim ka JHADC u Bah Madonbai Rymbai u la ong ba yn nym lah satia ban pynkylla ïa ka Reservation Policy namar la dep ïasoi soskular hapdeng ki nongïalam mynshwa.
U President ka Mowkaïaw Block Congress Committee (MBCC) Bah Rikut Parien u la ong, ka kyrtong jong ka NPP ka Kong Ampareen Lyngdoh ka dei ka MLA barim jong ka Congress bad ynda ka la heh ka la san ka la tbit kum ka MLA ka iehnoh ïa ka Congress bad mynta ka beiñ ka khoh ïa kane ka seng.
Nalorkata u la ong, ha ka por ka jingsynshar ka Congress, ka dei ka jingsynshar paidbah bad mynta pat ha ka jingsynshar ka BJP ka la dei ka jingsynshar donbor shimet ne ka dictatorship rule.
Haba pynkynmaw ïa ki jingnoh synñiang ka Congress, u Bah Rikut u la ong ba ka Congress ka la wanrah ïa ka NEIGRIHMS ha Meghalaya, ka la pyntreikam ïa ka bylla shispah sngi ne ka MGNREGS bad ïa ka Smart Card ban sumar sukher haba pang ba shitom.
U President ka MBCC u la ong ha khlam COVID-19 ka la long ka kabu ksiar ïa ka Sorkar NPP ban bamsap da ki spah klur ha ka jingai daw ba ai jingïarap sha ki briew kiba duk bad sha ki nongrep hynrei kita ki jingïarap baroh ki khlem poi satia sha kiba dei hok ban ïoh.
U Bah Rikut u la ong ruh ba tang kita ki briew hapoh ka kynhun High Level kiba ïoh ban tih bad shalan dewïong beaiñ bad kane ka jingleh ka la wanrah ïa ka jingduhnong kaba khraw ïa ka pla tyngka jong ka Sorkar.
U President ka MBCC u la maham tyngeh ïa ki paidbah ba lada ki jied ïa ka NPP ka mut ba ki jied ïa ka BJP.
