New Delhi, ïaïong:
Ki la don kumba 22 ngut ki nongïalam na ka seng jong u Chirag Paswan ka Lok Janshakti Party (LJP) kiba la iehnohkam hadien ba ki la sngew pyrshah jur halor ka jingbym ïoh tiket ban ïakhun ha ka ilekshon Lok Sabha ka ban wan, ha kaba kane ka la nang ktah jur ïa ka seng hadien ba ka la pynkut noh ïa ka jingïatreilang bad ka seng BJP hashwa ka ilekshon.
Napdeng ki nongïalam kiba la iehnohkam ki kynthup ïa ka Myntri barim ka Renu Kushwaha, u MLA barim bad u General Secretary barim jong ka seng LJP u Satish Kumar, u State Organisation Secretary u Ravindra Singh, u State General Secretary u Rajesh Dangi bad ki nongïalam jong ka seng kiba kynthup ïa u Ajay Kushwaha bad u Sanjay Singh.
Ka Renu Kushwaha ka la kynthoh jur ïa u Chirag Paswan halor ka jingai tiket jong u ïa ki briew kiba nabar, la ïathuh ka tyllong khubor. “Ïa ki tiket la dei ban ai sha ki nongbud jong ka seng ha ka jaka ban ai ïa ki briew kiba nabar. Ïa ki tiket la ai sha ki briew kiba nabar, kaba la paw ba ki riewpawkhmat bad ki nongbud kiba trei shitom kim shym la ïoh myntoi ei ei. Hato ngi dei tang ki shakri ban trei na ka bynta jong phi bad ban pynlong nongïalam ïaphi,” la ong ka Kushwaha.
U Satish Kumar u la ong ba ka kynhun ba pyrshah jong ka seng LJP mynta kan sa ai jingkyrshan ïa ka kynhun synrop INDIA ha ka ilekshon Lok Sabha. U la kynnoh ba u Chirag Paswan u la shet kylla ïa ki briew jong ka Bihar.
“Haba wan kum kine ki ilekshon kiba kham kyrpang, u heh nongïalam jong ka seng LJP u ai tiket sha kum kine ki jait briew ha kaba kane ka la pynlyngngoh shibun ïa ki nongbud jong ka seng. Ki briew kiba shyt pyrta bad ai jingïaroh ïa ka kyrteng jong u Chirag Paswan miet la bad sngi bad kyrmen ban wanrah ka jingpynthymmai ïa ka Bihar ki la shah shet kylla,” u la ong.
“Mynta ban ïada ïa ka ri, ngin sa ai ka jingkyrshan ïa ka kynhun synrop INDIA,” u la ong. Kum shi bynta ban kyrshan nia halor kane, u Ravindra Singh u la pynshisha da kaba ong ba u Chirag Paswan u la die ïa ki tiket. “U Chirag Paswan u la ïalehkai ïa ka jingsngew jong ki paidbah ka Bihar. Haba u la ïoh ïa san tylli ki konstitwensi na ka jingtrei shitom jong ngi, mynta u la die lut ïa baroh ki tiket. Ki briew jong ka Bihar kin sa ai jubab halor kane ka jingleh jong u,” u la ong.
