Imphal, ïaïong:
Ha ki lai sngi ba la leit hadien ba ka la don ka jinghap jong u slap ba jur, ka ‘erïong bad u phria ba la lynshop ïa ka jylla Mizoram, ki la don palat 2,500 tylli ki ïing, ki ïingmane, ki skul bad ki ïing sorkar kiba la shah pynjulor.
Kaba sngewsih ha kaba ïadei bad kane ka jingwan thombor jong ki bor ka mariang, la don kawei ka longkmie kaba la duh ïala kajong ka jingim. Ha kaba ïadei bad ki jingkheiñ jingdiah halor ki jingduhnong ba la wanrah na kine ki jingthombor ki bor ka mariang, ym pat lah ban ïoh jingtip bad ki bor ba dei khmih kim pat phah jingthoh ei ei halor kane, la ïathuh ki heh sorkar.
Ka ‘erïong kaba jur ha ryngkat u slap bad u phria ki la lynshiop ïa ki thaiñ ba bun jong ka Mizoram naduh ka sngi U Blei haduh ka sngi Ba-ar, ha kaba kane ka la wanrah ïa shibun ki jingjulor ha ka jylla.
Ha kaba ïadei bad kane ka jingjia, ki bor ba dei khmih ki la ïaid shakhmat ha ka ban leit jurip ïa kiba bun ki jaka khnang ban ithuh halor ki jingshah pynjulor jong ki shnong ba bun bad ban lah ban shim jingkheiñ halor ki jingjulor baroh bad ban ïoh phah sha ki bor ba dei khmih khnang ban ïoh ban sam jingïarap sha ki lanot.
