Nongpoh, Ïaïong 04
Ki nongïalam jong ka Regional Democratic Alliance (RDA) kaba dei ka kynhun synrop hapdeng ka United Democratic Party (UDP) bad Hill State People’s Democratic Party (HSPDP) ki la kyrpad ïa ki paidbah ba ki dei ban jied nongmihkhmat sha ïingdorbar Parliament da ka jingshemphang bad ka jingstad ha kane ka ilekshon.
Ïa kane ki la pynpaw ha ka jingïalang kaba la pynlong ha ka Sngi Palei ha ïew Nongpoh ban pan jingkyrshan na ki paidbah ka thaiñ ba kin jied ïa u kyrtong MP uba ka RDA ka la pynïeng, kata ïa u Bah Robertjune Kharjahrin.
Ha kane ka sngi nalor u Bah Robertjune Kharjahrin, la ïadon lang u President ka UDP Bah Metbah Lyngdoh, President ka HSPDP Bah KP Pangniang, u MLA ka Nongpoh Bah Mayralborn Syiem, MLA ka Mawkyrwat Bah Renikton Lyngdoh lem bad kiwei kiwei ki nongïalam na ka jylla bad district.
Haba kren ha kane ka jingïalang, u Bah Robertjune u la pynpaw ïa ka jingbynñiaw ba bunsien ki paidbah ki kham duna ban mih shakhmat ban leit thep ‘vote’ ha ka ilekshon jied ïa ki MP sha ka ïingdorbar Parliament namar kam shongshit kumba long ka ilekshon jied ïa ki MLA. U da kaba kyntu ba mynta ka kynti kaba donkam ka long ba ki paidbah kim dei shuh ban kheiñ sting, hynrei ki dei ban mih shakhmat namar ka dorbar Parliament ka dei kaba lah ban rai ïa shibun ki mat ki jura khamtam kiba ktah matïong ïa ka jaidbynriew. U la ong ruh ba kum uwei na ki kyrtong uba ïa aireng ha kane ka ilekshon, u don shibun ki mat ki jura kiba u angnud ban pynurlong lada ki ibit ban jied ïa u kum u MP na rilum Khasi Jaiñtia.
Nalor kata, u Bah Robertjune u la ong ka jylla Meghalaya ka dei kaba donbok ïa ka jingdon jong ka District Council lyngba ka Sixth Schedule lane kata ka Khyrnit kaba Hynriew ban ïada ïa ka khyndew ka shyiap bad ka riti ka dustur da kaba kynthoh ruh ba ki don ki ‘langïong kiba thmu ban pynduh-pyndam ïa kane ka jinglong kyrpang jong ka jylla bad ong ruh kaba donkam ka long kumno ban dang pynkhlaiñ shuh shuh ïa ka District Council.
Ha kaba ïadei bad ka jingbym rung jong ka ktien Khasi ha ka Eight Schedule lane ka Khyrnit kaba Phra, u Bah Robertjune u la ong, ka jingbym pat rung ka ktien Khasi ka la pynduh mynsiem ïa kiba bun ki khun samla bad kum u kyrtong u don ïa ka thong ban pynurlong ïa kane ka mat kaba la sahteng kumba ka Khasi Author Society (KAS) lem bad ki seng ki la mih shakhmat ban leit dawa shaduh sha nongbah New Delhi.
U la ong ruh ba ka jingthmu ka sorkar kmie ban pyntreikam ïa ka Uniform Civil Code ka buh jingma shikatdei ïa ka jylla la ka dei ha ka liang ka riti ka dustur, ka rukom aijait, ka rukom mane blei bad kiwei kiwei de ki jinglong ba kyrpang kum ka jaidbynriew.
U la ong ruh ba ka jingbym lah jong ka sorkar ban pynbeit ïa u pud u sam ka la pynlong ‘langkñia ïa ki paidbah kiba sah ha kine ki thaiñ khappud bad ïathuh ha ka jingleit ïuh kjat ka jong u sha Mawlasnai ha kine ki khyndiat sngi, u la ïoh jingtip ruh ba kumba saw ngut ki samla Khasi ki dang don ha along jong ka Assam bad kynnoh ruh ba kine baroh ki wan jia namar ba ka sorkar kam lah ban pynbeit ïa u pud u sam haduh mynta-mynne.
Kitei ki nongïalam ka RDA ha ka jingkren ba ki la ai ha kane ka sngi ki la kyrpad ïa ki paidbah ba kin ai ïa ka jingkyrshan ba pura ïa u Bah Robertjune Kharjahrin ba un ïoh ïa ka jingjop donburom ha kane ka ilekshon MP da kaba pynshai ruh ïa ki nongrim kiba kum ki seng ‘riewlum ki don ban trei na ka bynta ki jingdonkam jong ka ri bad ka jaidbynriew.
