Jowai, Ïaïong 04
Ki Myntri, ki MLA ki dei ki shakri jong ki paidbah ym ki kynrad jong ki paidbah namar ka bor ha shong ha ki paidbah ban jied ïa ki MLA ne ki MDC ne MP namar ngi don ha ka synshar paidbah.
Ïa kane la ong da u MLA ka Mawlai Bah Brightstarwell Marbaniang ha ka jingïalang ba la pynlong ha ïew Raliang ha ka Sngi Palei ban pan jingkyrshan ïa u kyrtong ka VPP u Dr. Ricky AJ Syngkon ha kane ka ilekshon MP ka ban long ha ka 19 tarik mynta u bnai.
Haba bteng ïa ka jingkren, u MLA ka Mawlai u la kyntu ïa ki paidbah ba kim dei ban shah ïalam bakla ba ki MLA ne ki MDC ne ki MP ki dei ki kynrad jong ki, bad uba riewspah ne uba duk ne uba stad ne uba bieit u don tang shi ‘vote’ bad ka ‘vote’ jong ki ka shongdor kumjuh.
Une u MLA ka Mawlai u la ong, ba u la ïoh jingtip ba ki la don ki seng saiñ hima kiba la phah ïa ki nongtrei jong ki ban peitngor kino-kino nongshong shnong kiba leit sha ki jingïalang ka VPP ne kiba pynpaw dak ban kyrshan VPP khnang ban pynduh skhim ne ki lad jingïarap sha ki hynrei ki paidbah ki dei ban sngewthuh ba ki skhim baroh ki dei ba la bhah salonsar ïa ki paidbah bad kim dei na ki pla jong ki MLA ne ki MDC.
