Shillong, Ïaïong 04
Ka Khasi Students’ Union (KSU) ka la ther tyngeh halor ka jingmih ki nongïalam seng saiñpyrthei (politician) hapoh ka Jylla kiba shu pyni ka jingthiang ka ktien ban ieid jaidbynriew tang ha ki por ilekshon, hynrei ynda la jop bad shong shuki pat kaei kaba ki la leh na ka bynta ka jaidbynriew.
Ïa kane la pynpaw da u General Secretary ka KSU, samla Donald V Thabah, ha kaba u la ong ba ki ‘riew saiñpyrthei ki thiang ba ka ktien haba sngap ba ki kren ha ki por ïalap ilekshon, hynrei kim ju lah pat ban pynurlong na ka bynta ban ïada ïa ka jaidbynriew.
Haba pynpaw bad ainam ba ki don tang katto-katne ki nongïalam saiñpyrthei kiba la trei shitom bad leh eiei na ka bynta ka jaidbynriew, une u nongïalam ka KSU u la ai nuksa ïa u Bah Martin N Majaw, uba la wanrah ïa ka aiñ bat khyndew ne kata ka Meghalaya Land Transfer Act bad katto-katne ngut kiwei pat.
Shuh shuh haba kylli, u samla Donald u la ong, kane ka jingkren thiang bad ieid jaidbynriew da ki ‘riew saiñpyrthei ha ka por ilekshon kam long shuh kaba thymmai bad buh jingkylli ruh ba katno ngut ka Jylla ka la sei ïa kita ki ‘riew saiñ hima la katta ki snem.
U samla Donald u la ong, ba ki ‘riew saiñpyrthei ba mynta ki thiang tang ka ktien lada ki kren ha ki jingïalang paidbah, ki kren ieid jaidbynriew la kum ba dei tang ma ki kiba ieid jaidbynriew, pynban ynda ki la jop bad shong ha ka shuki kaei kaba ki la leh.
“Ngim pat ïohi haduh mynta aïu ba ki la leh, kaei ka jingshakri ba ki la ai ban pyni ba ka jaidbynriew jong ngi ka la shong shngaiñ, khamtam ban weng ïa ki mynder ri kiba la wan buhai shnong hapoh ka Jylla,” la ong u samla Donald.
