Shillong, Ïaïong 04
Ka kmie bad u kpa jong ki khynnah kiba ngam jyllop kim tip briew shuh haba ki la ïam lynñiar hadien ba ki pulit jong ka Thanat Mawlai bad ka kynhun Search and Rescue Team (SRT) ki la ïoh ban wanrah ïa ka met jong ki na Wah Umshing sha madan phutbol mawïongrim ha ka por 6:30 janmiet.
Kitei ar ngut khynnah ki la duh ei la ka jingim hadien ba ki la ngam jyllop ha ka Wah Umsning kaba don ha Mawlai Mawïongrim kaba don harum ka surok Mawlai Bypass lada ïaid na jaka ïeng bos Inter State Bus Terminal kaba la jia ha ka 4 tarik Ïaïong 2024.
Kine kiba la khlad la tip kyrteng kum ka Laritngen Nongsiej, 11 snem bad u Bison Nongsiej, 18 snem ka rta.
Katkum ka jingïa-thuh ki bahaïing la ong ba kine ki khynnah ki dei shipara arkmie na Mawïongrim Block-4. Ki don 6 ngut kiba leit lang tang shi bahaïing suda kata 4 ngut ki kynthei bad 2 ngut ki shynrang.
La ïathuh ba kine ki khynnah ki la mih na ïing ha ka por 10:00 baje mynstep ban leit sha katei ka wah kaba riat bha ban leit jngi.
Haba ki la ïa jngi, kawei ka khynnah kaba dang rit ka la ngam ha um bad ka khynnah kynthei kaba dang 11 snem ka rta ka la leit ïarap ban pyllait im ïa ka para katba ïalade ka la ngam jyllop. Ha mar kumta une u shynrang ba dang 18 snem ka rta u la leit ban ïarap bad mar kumta ki la ngam jyllop baroh ar ngut.
Kumta, kine ki saw ngut kiba la lait im ki la wan mareh sha shnong ha ka por 2:00 baje nohphai sngi ban pyntip sha ki bahaïing bad hadien ba la wan pyntip sha ki nongïalam shnong la pyntip sha ki pulit ka thanat Mawlai bad ka Search and Rescue Team ban leit sei.
Haba ki pulit ki la poi sha katei ka wah ka shimpor da ki kynta ban wanrah sha shnong namar ka jaka ka long kaba riat bad dei ha ka por 6:30 janmiet la wanrah ïa ka metïap jong baroh ar ngut sha madan phutbol ka shnong Mawïongrim.
Kumta mar sien wan poi ka met la ïohi ba ka kmie bad u kpa jong une u khynnah shynrang ki la ïam lynñiar bad kyllon ha madan, katba ka kmie jong kane ka khynnah kynthei kam pat tip namar ka dang leit bylla bad u kpa ruh u leit bylla sha jngai.
Haba ïakren bad u Rangbah Shnong Mawïongrim, Bah Sorbar Lyngdoh Nongpyiur, u la ai khublei ïa ki samla shnong, ki pulit kiba la ïoh ban sei ïa ka metïap jong kine ki khynnah kiba ngam jyllop ha Wah Umshing.
Haba u nongthoh khubor u la poi sha Mawïongrim, la ïohi katba ki pulit ki dang leit sei ïa ka metïap, ki paramarjan bad ki bahaïing ki la leit ban pyntngen ïa ka kmie kaba dang ap ha madan phutbol namar kam pat ngeit ba u khun jong ka u la khlad.
