Bengaluru, ïaïong:
U Myntri Rangbah jong ka Karnataka u Siddaramaiah u la pynshisha da kaba ong ba u Myntri jong ka sorkar kmie uba dei khmih ïa ka tnat ki kam pohïing u Amit Shah um shym don hok ban dawa ïa ki vote na ki nongthep vote, ha kaba u la kynnoh ba ka sorkar ba la lamkhmat da ka seng BJP ha ka sorkar kmie ka la shet kylla bad leh bymhok ïa ki paidbah jong ka jylla halor ka mat ba ïadei bad ka jingpynsahteng ha ka ban pyllait ïa ka jingïarap pisa kaba dei ban leit sha kito ki lanot kiba la ïakynduh jingeh na ka jingrang tyrkhong.
U la ong ba u heh nongïalam jong ka seng kaba la ïatreilang bad ka seng BJP ka JD(S) u H D Kumaraswamy u la dei ban kylli na u Shah, mano ba la dei leit na ka bynta ka jingïalap ilekshon Lok Sabha, ban ai ïa ka pisa jingïarap ha kaba ïadei bad ka jingrang tyrkhong sha ka jylla.
“Ai ba u Amit Shah un wan lane u Myntri Rangbahduh u Narendra Modi u wan lane u J P Nadda (BJP President) u wan. Ka mat dei mano mano ruh. U Amit Shah u la long uba hakhliehduh uba don ïa ka bor, hato u la ai ka jingïarap pisa na ka bynta ka jingrang tyrkhong? Halor kano ka nongrim ba u sngewdonhok ban dawa ïa ki vote na ki briew jong ka Karnataka?” la kylli u Siddaramaiah ha ka por ba u la ïakren bad ki nongthoh khubor.
“Hato u Shah u la ai ka jingïarap pisa ha kaba ïadei bad ka jingrang tyrkhong? U Amit Shah um dei u Chairman jong ka kynhun haba hakhliehduh. Hato ka sorkar kmie ka la ai jingbit na ka bynta ka Mekedatu Project, Environmental Clearance na ka bynta ka Mahadayi Project, ka bailutksan kumba la hukum da ka 15th Finance Commission, da ?5,300 klur la kular ban ai sha ka Upper Bhadra Project? Balei ba ki briew ki dei ban vote na ka bynta jong ki? U Amit Shah da lei-lei ruh um donhok,” u la bynrap.
Kumba la sakhi, la ong ba ka jylla Karnataka ka la rai kum ki jaka ba ïakynduh jingeh na ka jingrang tyrkhong ïa ki 223 tylli ki jaka na ki 240 tylli ki thaiñ, 196 tylli napdeng jong ki ki dei kiba la shah ñiew ba ki la shah ktah jur na ka jingrang tyrkhong.
