Shillong, Ïaïong 04
Ka Shillong Lajong FC kan pynkhreh ïa ka jingïalehkai ha la ïing jong ka lympung I-League 2023-24 pyrshah ïa ka Mohammedan SC ha ka Sngi Saitjaiñ ha SSA Stadium ha ka por 7 baje janmiet.
Kane ka jingïakhun ka long kaba kham kongsan ïa kane ka kynhun ïalehkai ha nongbah hapoh ka jingïalam u Bah Bobby L. Nongbet (coach) namar ka la shu ïai sah ha kajuh ka kyrdan (hynriew) hadien ki jingshah rem bad ki jingïakhaid ha ki jingïakhun ba la dep.
Kumba ka long mynta ka Mohammedan ka dei ka kynhun kaba khlaiñ bor ha kane ka lympung namar ka la ïoh ban lamkhmat da kaba kamai 49 point na ki khatar sien ïakhun bad ka la tam haduh 18 point ïa ka Lajong.
Lah ban pynkynmaw ha ka wat kaba nyngkong kaba la long ha Kolkata, kine ki kynhun ki la ïakhaid mar 1-1 kol. Dangshen ha ka jingïalehkai ba la dep, ka Lajong ka la shah rem ha ka Delhi FC da 3-1 kol.
Ha kaba ïadei bad kane ka jingïalehkai, na ka liang ki bor pynïaid ka SLFC ki la pynbna ba ka jingdie ïa ki tiket kan sdang naduh ka Sngi Thohdieng kaba lah ban ïoh na Electronic Centre (Police Bazaar), Cafe Shillong (Laitumkhrah) bad na SSA Stadium Ticket Counter, Polo.
