Florida, Iaïong:
Ha kane ka khubor bapylla, la ong ba uwei u kynja lyngkhot nar na haw-haw uba don kumba 1 kilo ka jingkhia u la leit hap ha kawei ka iing ha ka nongbah Florida. Kane ka la jia ha ka 8 tarik jong u Lber ba la leit, ha kaba utei u kynja lyngkhot maw uba la ikop kumba u dei u lyngkhot maw na haw-haw hi, u la leit hap ha katei ka iing kaba don hapoh Naples jong ka nongbah Florida.
La ong na ka liang u trai iing uba la ithuh kum u Alejandro Otero u dang leit jingleit ha katei ka por u la ioh ia ka ‘phone’ na u khun jong u, uba la pyntip halor ka jingleit hap jong utei u kynja maw uba heh haduh ba ka tnum jong katei ka iing ka la pait bad utei u maw u la poi haduh ka madan jong ka kamra jong katei ka iing. Pynban ka long pat kaba donbok ba ym shym la don mano-mano ba mynsaw ha katei ka jingjia.
Kumta na ka liang u Otero u la iathuh ba u dap da ka jinglyngngoh bad ka jingkyndit ban iohi ia kat utei u maw uba leit hap khyllah ha ka iing sah jong u bad ka long ruh pat kaba donbok shi katdei eh ba um shym la ngat ne dei ia utei u khun uba don ha iing ha katei ka por.
Ki bor pyniaid ki la iathuh ba utei u kynja maw ne kynjar nar uba khia, la ikop kumba un dei u kynja nar uba lait na ki ‘battery’ ne ki tiar ba la pyndait shalor haw-haw lane ka ‘International Space Station’. Ki stad saïan jong ka tnat NASA ki la leit shimti ia utei u nar lyngkhot bad ki la rah ban peit bniah la u dei u jait tiar aiu uba wan hap na haw-haw bad kaei ka jingma kaba ap ia ki paidbah na ka jingwan hap jong utei u kynja nar lyngkhot ha kane ka por.
