Shillong, Ïaïong 04
Ka Khasi Students’ Union (KSU) ha ka Sngi Palei ka la kyntu ïa ka sorkar ba kan ym pynjynjar bad pyntyrha shuh ïa ki dkhot ka seng, lym kumta ka seng kam banse ban shim da kiwei pat ki sienjam kaba lah ban ktah ïa ka shongsuk-shongsaiñ.
Haba kren sha ki lad pathai khubor, u General Secretary ka KSU u samla Donald V Thabah, u la pynpaw ïa kane halor ka jingkem jong ki pulit ïa ar ngut ki dkhot ka KSU South Khasi Hills District Unit na ka shnong Wah-u-Tim bad Saitsohpen dang ha kine ki khyndiat sngi halor ka jingshah pynïap jong ar ngut ki bar jylla ha ka shnong Ichamati bad Dalda ha ka 27 tarik u Lber.
Halor ka jingphah dorkhas ka Vishva Hindu Parishad (VHP) sha ka President ka Ri India ka Droupadi Murmu ban tuklar halor ka jingshah pynïap jong ar ngut ki bar jylla ha Ichamati bad Dalda, bad kumjuh ruh ïa ka jingdawa jong ka Coordination and Welfare Committee (CWC) Shella Bholaganj Block ïa ka Sorkar ban kem mardor ïa kiba donkti bad ka jingpynbna jong ka Meghalaya Linguistic Minority Forum (MLMF) ban pynlong ïa ka jingïakhih shong kyllaiñ myngngor ha Khyndai Lad, u samla Donald u la ong ba seng kan ym shong kli-kti namar lada ma ki, ki ïakhih ïa ka jingshah ban beiñ jong ki para jait ki jong ki, ka KSU ruh kan hap mih ban ïada ïa ka jingshah ban beiñ jong ki paradoh ki parasnam lajong.
Une u nongïalam u la ong ba ka KSU ka la kren da kaba shai kdar ba ka VHP kam dei ban wan tuklar eiei ïa ki kam hapoh ka Bri U Hynñiewtrep namar ka KSU kam ju tuklar ïa ki kam kiba ka VHP ka leh ha ri thor.
Haba phah kyrwoh jingmaham sha ka VHP ha ka jingrakhe ïa ka Sngi Kyrsiew Ri (Khasi National Awakening Day), u samla Donald u la ong, “Ngi, ngim ju tuklar ïa ka kam jong ka VHP sha dewbah India, ka VHP ruh kam dei ban wan tuklar ïa ki kam ki jam hapoh ka Bri u Hynñiewtrep. Ka VHP kam dei ka seng kaba long seng trai ri hapoh kane ka ri Khasi, ka dei ka Foreign Agency, ka Foreign Organisation bad kam dei ban tuklar eiei ha kaba ïadei bad ka jinglong-jingman ha kane ka Bri U Hynñiewtrep.”
“Sa kawei ka kyrwoh ïa ka VHP halor ka jingong ba ka peit ïa baroh ki nongshong shnong India, hynrei kaba sngewphylla ka long ba ka VHP ka peit pynban ïa kita ki mynder poiwir kiba wan buhai shnong kiba ïoh ïa ki kot ki sla lyngba ki kam buit tuh bad kam peit ïa ngi ki trai ri trai muluk jong kane ka jaka bad kane ka pyni ïa ka jinglong arsap jong ka VHP,” la kynthoh u samla Donald.
Une u nongïalam ka KSU u la ong, “Kaba khatduh ka khubor ïa ka VHP, lada phi sngew ba phi don ïa ka jingkitkhlieh ïa ka jinglong-jingman hangne hapoh ka jylla jong ngi, tehlakam shwa ïa ki dkhot jong ki, kiba don hangne hapoh Shillong, kiba ïaid ‘rally’ mynshem snem hapoh Laban ha ka Sngi U Blei kiba ïeng hakhmat ka khyrdop jong ka ïingmane Grace Covenant Church bad ha Laban Presbyterian Church kiba hylla Jai Shri Ram, kiba hylla ïa ki kyntien shitniam ban byrngem-byrsit ïa ki paradoh parasnam jong ngi kiba dang shong jingïaseng.”
U la ong, “Lada ka VHP kam leh kumta, ka mut ba kane ka seng ka shu long tang na ka bynta ka jingmyntoi jongno-re-jongno. Ka KSU kam tieng kam smiej bad kan ym ailad hi ruh ïa kine ban wan pynduh mynsiem, ban thombor ïa ki paradoh parasnam ki jong ngi.”
