Nongpoh, Ïaïong 04
U President ka VPP, Bah Ardent Miller Basaïawmoit, u la ther tyngeh ïa ki nongïalam jong ka NPP kiba sdang ban kam trai wat ïa ka Secretariat ruh da kaba kynnoh ba kine ki VPP, ah! ki pyrshah sorkar, ki beiñ sorkar, katta ruh ki dang ïa nud ban wan sha Secretariat.
U Bah Ardent u la kren ïa kane ha ka jingïalang paidbah ka VPP ha Nongpoh, bad ha kaba u la ong da kaba jubab ba kum u nongïalam bad u nongmihkhmat uba la jied da u paidbah, u leit sha Secretariat ym ban leit pan bai khaw na u Conrad K Sangma, hynrei ban leit dawa ïa ka hok ka jong u paidbah.
Une u nongïalam ka VPP u la pynpaw ruh ïa ka jingsngewkmen ban ïohi ïa ka jingsdang jong ki paidbah ban sngewthuh ïa ka jingdonkam ban wanrah ïa ka synshar ka khadar kaba khuid kaba suba da ka jingwan shakhmat jong ki spah ngut ki paidbah ha man la ki jingïalang ka VPP da kaba ong ruh ba kane ka dei ka jingsdang jong ka sla kaba thymmai jong ka jingkylla ha ka jylla, lane kata ka revolution ban wanrah ïa ka jingsynshar kaba lait na ka bamsap bampong bad jingsynshar kaba pynkiew spah tang ïa uwei u ar.
Halor ka jingkynnoh ba ka VPP ka pyrshah ïa ka ktien Hindi, u Bah Ardent u la pynshai ba katkum ki kyndon jong ka Rule jong ka ïingdorbar thawaiñ ka jylla, ka dei tang ka ktien English kaba lah ban kren bad ka jingïoh ïa ka jylla ruh ha ki snem 1970 tam ka dei namar ba ka sorkar Assam ka pyrshang ban pynrung ïa ka ktien Assamese ïa baroh da kaba kynthoh ruh ïa u Symbud Myntri Rangbah ka jylla, u Bah Prestone Tynsong ba jin lada dei ba u synshar ha kitei ki snem 1970, lehse mynta baroh la hap ban ïakren lut da ka Hindi.
Shuh shuh u Bah Ardent u la ong ruh ba kum ka seng kam da sngewpher than ïa kata ka jingjop ne ka jingrem naba kata ka dei ka rai ka jong u paidbah, hynrei ka thong kaba hakhmat eh jong ka seng ka long ban pynsngewthuh ïa ki paidbah ïa ka bor kaba ki don naba ki dei maki, kiba thung ïa u Rangbah Shnong, u MDC, u MLA bad u MP bad ba kine baroh ki dei tang ki shakri jong u paidbah. Kumta ki paidbah kim dei satia ban tieng ïa u MDC, u MLA ne u MP, namar ka bor kaba kongsan ka dei ha u paidbah.
