Nongpoh, Ïaïong 04
Ka Ri Bhoi District Cycling Association (RBDCA) ka la pdiang bad pynkup burom ïa ki san ngut ki nongñiah saikil ka Jylla kiba la ïoh khur takma ha ka lympung ïakop ñiah saikil ba la tip kum ka 20th National MTB Championship.
Ïa kane ka jingïakop la pynlong ha Panchkula, Haryana da ka Haryana Cycling Association hapoh ka jingkhmih jong ka Cycling Federation of India naduh ka 28 tarik bad pynkut pat ha ka 31 tarik u Lber 2024. Ïa kane ka kynhun la ïalam da u Bah Lening S. Bareh, President ka Meghalaya Cycling Association bad u Bah L. Lamare, Secretary ka West Jaiñtia Adventure and Cycling Association.
Hadien ba kitei nongñiah saikil ki la wanphai sha ka jylla, ka RBDCA hapoh ka jingïalam u General Secretary, Bah Mihpli Wahlang ha ka miet jong ka sngi Balang da ka mynsiem kaba sngewsarong bad sngewkmen ka la ïoh ban pdiang burom ha Nongpoh bad aiti ïa ki syrnod ban pynpaw ïa ka jingsngewsarong halor ka nam ka burom kaba kitei ki nongñiah saikil ka Jylla ki la ïoh khur na katei ka jingïakop ñiah saikil ha kaba la wan ïashim bynta lang da kiwei kiwei ki jylla jong ka ri baroh kawei.
Ha katei ka lympung, u Kevin Lyngdoh u la ïoh ban khur ïa ar tylli ki takma rupa ha ka Youth Category jong ka XCO Trial bad Mass Start, katba u Aaron Oniel Kharpuri u la khur ïa ka takma Ksiar. Ïa kawei pat ka takma rupa la khur da u Taitus Ch. Marak ha ka Downhill Elite Category. Nalor kitei kiba la ïoh takma, u samla Lambormi Phawa u la wan ha ka kyrdan kaba san ha ka XCO Junior Men Category, katba u Fabian Khyllait pat u la wan ha ka kyrdan kaba hynñiew ha ka XCO Youth Category.
Ka khubor kaba sngewtynnad ka long ba u samla Aaron Oniel Kharpuri lem bad u Taitus Ch Marak ki la shah jied ruh ban leit ïashim bynta ha ka Asian Continental MTB Championship kaban long ha Malaysia naduh ka 8 tarik haduh ka 12 tarik jong u bnai Jymmang mynta u snem halor ka jinglah ban lehkai bha bad khur takma ha kane ka lympung.
Na ka liang u Bah Mihpli Wahlang lem bad ka RBDCA ka pynpaw ïa ka jingsngewsarong ïa kine ki samla kiba la wanrah ïa ka nam ka burom ïa ka jylla baroh kawei bad kitbok kitrwiang ruh ba kin nang lah ban ïalehkai khambha shuh shuh ha kiwei pat ki lympung kiban wan.
