Itanagar, ïaïong:
Ka seng ka liang pyrshah ha Arunachal Pradesh ka seng Congress, ha ka sngi Ba-ar ka la pyllait ïa ka mat treikam na ka bynta ka ilekshon Assembly ka ban long ha ka 19 tarik, Ïaïong ha ka jylla ha kiba bun ki jingkular ha kaba ïadei bad ka pule-puthi, ka koit ka khiah bad ka lad thungkam-thungjam.
Ha ka jingpyllait ïa ka mat treikam u President jong ka PCC u Nabam Tuki u la pyntip ba ka mat treikam ka dei kaba la pruiddur da ka Committee hadien ba la ïakren sani bha ha kaba ïadei bad kine ki jingpyntreikam na ka bynta ban pynbiang ïa ki jingdonkam bad ban ai jingmyntoi sha ki paidbah jong ka jylla.
Ka jylla kan sa pynlong ïa ki ilekshon na ka bynta ar tylli ki Lok Sabha bad 50 tylli ki Assembly konstitwensi, ha ka bynta kaba nyngkong ha ka 19 tarik, Ïaïong.
Ka seng BJP kaba bat ïa ka jingsynshar ka la dep ban jop lypa ha 10 tylli ki konstitwensi ha ka kynhun jong ki 60 ngut ki dkhot jong ka Assembly namar bym don nongïakhun pyrshah.
U Tuki, uba la ïakhun pyrshah ïa u Myntri jong ka sorkar kmie jong ka Earth Sciences u Kiren Rijiju na Arunachal West Parliamentary konstitwensi, ha ka jingïakren bad ki nongthoh khubor u la ong ba lada ka kynhun synrop INDIA ka wan ha ka bor synshar, baroh ki jingphoh sniew bym shym lah ban pynurlong jong ki paidbah jong ka jylla kin sa urlong.
