Thiruvananthapuram:
U nongïalam jong ka seng Congress u Rahul Gandhi bad ka Annie Raja jong ka seng Communist Party of India’s (CPI) ki la long ki kyrtong ba hakhmat eh kiba la leit ban pynrung kyrteng ha ka sngi Balang na ka bynta ka ilekshon Lok Sabha ka ban long ha ka 26 tarik, Ïaïong.
Ka Annie Raja, kaba long ka General Secretary jong ka CPI’s National Federation of Indian Women bad ka kurim jong u General Secretary jong ka seng u D Raja, ka la pynrung kyrteng ban ïakhun pyrshah ïa u Rahul Gandhi.
Kine baroh ar ngut, kata u Rahul Gandhi bad ka Annie Raja ki la pynlong ïa ka jingïaid paidbah ha ki surok ha ka konstitwensi hashwa ba kin leit ban pynrung kyrteng.
Katkum ki sakhi bad ki jingpynshisha ba la phah da u Rahul Gandhi, uba long u President barim jong ka seng Congress u don ïa ka pisa ha ka Stock Market Investments da T. 4.3 klur, ka Mutual Funds Deposits kaba la kot sha ka T. 3.81 klur bad T. 26.25 lak ha ka Bank Account, la ïathuh ka tyllong khubor.
Na ka jingkhmih bniah halor ki jingpynshisha, la ong ba u Rahul Gandhi u la don T. 55,000 ka pisa bad baroh ka jingwan jong ka pisa jong u ka la long T. 1,02,78,680 ha ka snem jong ka kheiñ ka diah hapdeng u snem 2022-23.
Katkum ka jingpynshisha, la ong ba ka jingkiew jong ka spah ka phew kaba lah ban khih jong u Rahul Gandhi ka la kiew da 59 per cent ha ki san snem, la ïathuh shuh shuh ka tyllong khubor.
Ki jingdon jingem kiba lah ban pynkhih jong u Rahul Gandhi ki la kot sha ka T. 5.8 klur ha u snem 2019, katba ha ka jingpynshisha ba la phah ha ka por ba la dep, ka jingkiew jong ka spah kaba lah pynkhih jong u ka la long da T. 9.24 klur.
U la bei tyngka ha ka National Savings Schemes, Postal Savings, Insurance Policies bad kiwei pat ki jaka kaba la kot sha ka T. 61.52 lak.
U la don ïa ka spah kaba ïaid katkum ki lynti jong ka aiñ da T. 49.7 lak, la ïathuh ka tyllong khubor.
La ïathuh shuh shuh ba u Rahul Gandhi u la don ïa ka spah kaba T. 20 klur bad ka jingkamai pisa kaba wan ha ka shi snem kaba la kot sha palat T. 1 klur.
U Rahul Gandhi u la pynshisha ba u la don ïa ka jaka rep, kaba ki la long trai lang bad ka Priyanka Gandhi Vadra, ha Mehrauli kaba don ha Delhi, ha ryngkat ka jaka ba don ka shlem treikam ha Gurugram kaba la kot sha ka T. 11 klur.
Katba ka jingdon spah jong ka Annie Raja kumba ka la pynshisha ka la long tang kumba T. 72 lakh, la ïathuh ka tyllong khubor.
Ka Annie Raja ka la pynshisha ba ka la don tang T. 10,000 ha kti, kaba hapoh Bank ka la long T. 62,000, ki jingdeng ksiar kiba la kot sha ka T. 25,000 bad ka spah kaba hiar pateng ka la kot sha ka T. 71 lak.
U Rahul Gandhi un ïakhun pyrshah ïa ka Annie Raja bad ïa u kyrtong jong ka seng Bharatiya Janata Party uba long u President jong ka seng ha ka jylla u K Surendran ha Wayanad.
U Rahul Gandhi u la jop ha ka jingïakhun na Wayanad konstitwensi ha u snem 2019 ha kaba u la jop da palat 4 lak vote.
Ka jingthep vote ha baroh 20 tylli ki Parliamentery konstitwensi ha Kerala kan sa long ha ka 26 tarik, Ïaïong, ha ka bynta kaba ar jong ka ilekshon, katba ka tarik kaba khatduh ban pynkut ïa ka jingpynrung kyrteng kan long ha ka 4 tarik, Ïaïong, kumba la pynbna da ka Election Commission.
