Shillong, Ïaïong 04
Ka Khasi Students’ Union (KSU) ka la sdang ïa ka lympung ïalehkai basketball ba la tip kum ka “Maitshaphrang Khasi League Basketball 2024” ha ka Sngi Palei ha madan ïalehkai basketball jong ka Mawlai Nongpdeng.
Ka jingpynlong ïa kane ka lympung ka long shi bynta ban rakhe ïa ka sngi kyrsiew ri (Khasi National Awakening Day), ha kaba la wan ïashim bynta da 42 tylli ki kynhun kiba kynthup ïa 30 tylli ha ka liang ki shynrang bad 12 tylli ha ka liang ki kynthei.
Ïa kane ka lympung la plie da u General Secretary ka KSU Sengkmie, u samla Donald V. Thabah ha ryngkat ka jingïadon lang u samla Raymond Kharjana, Organizing Secretary ka KSU Sengkmie, kumjuh u samla Eddie Malngiang, General Secretary ka KSU Mawlai Circle, samla Rapborlang Nongrum, General Secretary barim ka KSU Mawlai Circle, u Samla Badonbok Malngiang, Sports Secretary ka KSU Mawlai Circle bad kiwei kiwei.
Haba ai jingkren ha kane ka sngi, u samla Donald Thabah u la pynpaw ba ka jingthmu ban pynlong ïa kane ka lympung ka long ban plie lad ïa ki paradoh-para-snam ba kin pyni ïa la ki sap ïalehkai. “Kane ka lympung ka long ban ai rynsan ïa ki samla Khasi jong ngi ba kin pyni ïa ki sap ïalehkai namar lyngba kane ka lympung kan long ka jingïarap pat ïa ki ba kin long kiba la khreh na ka bynta kiwei pat ki lympung ki ban long hapoh ka Jylla lane ha kylleng jong ka ri.”
Namar kata, u la kyntu ïa baroh ki kynhun ba kin ïalehkai bha naduh ka mynsiem ha ryngkat ka jingshit rhem khnang ba kin nang lah ban jam shakhmat ha ki kam ïalehkai.
Haba phai sha ki jingïakhun jong kane ka sngi sdang, ka Mawkasiang Marvels bad ka Seng Samla Mawlai Nongpdeng ki la ïoh ïa ka jingjop.
Ha ka jingïakhun jong ki kynthei, ka Mawkasiang Marvels ka la pynliem noh ïa ka Dubakh ‘C’ da 62-29 basket bad ïa ka nam Player of Match la ïohpdiang da ka Nazareen Nengnong na ka Mawkasiang. Ha ka liang ki shynrang, ka SSMN ka la jop da 51-40 basket ïa ka KSU Mawprem bad ïa ka ka nam Player of Match la khur da u Steven Lamare na ka SSMN. Kane ka lympung la khmih lynti ban pynkut noh ha ka 18 tarik mynta u bnai.
Ha ka Sngi Thohdieng kan don tang kawei ka jingïakhun ki kynthei hapdeng ka The Team pyrshah ïa ka Dubakh ‘A’, katba ha ka liang ki shynrang kin don san tylli ki jingïakhun hapdeng ka ONYX pyrshah ïa ka Mawkdok ‘B’, ka Aeronation ïa ka Dubakh ‘F’, ka Dubakh ‘A’ ïa ka Umsning SCC, SYM ïa ka TSK bad ka Azriel SC ïa ka CHI IIN B.C.
