Shillong, Ïaïong 04
Ki pulit ka Longding ha Arunachal Pradesh ha ka Sngi Palei ki la kurup pisa kumba `1 klur na kawei ka kali kaba la suba ba ka la bud lang ïa ki kali kiba la synran ïa u Myntri Rangbah ka Meghalaya, u Conrad K. Sangma, hynrei ynda la tohkit, ki pulit ki lap ba kam dei satia kaba bud lang ïa u Myntri Rangbah. Katkum kawei ka lad pathai khubor Eastern Sentinel, la ïathuh ba ka kynhun kaba kynthup ïa ka Flying Squad bad ki pulit ka Longding ki la pynlong ka jingpeitngor bad talasi ïa ki kali kiba ïaid lyngba ka jaka ap pahara ha Kanubari Check Gate mynta ka janmiet.
U Superintendent of Police (SP) ka Longding, u Dekio Gumja, haba kren sha ki lad pathai khubor, katkum ka jingpyntip na ki lad pathai khubor kiba don ha Arunachal, u la ong ba ka kynhun peitngor ka la pynsangeh ïa ki kali bad talasi ïa kawei ka kali SUV ha kaba la lap ïa ka pisa kaba don hapoh ka kali kaba dei ban leit sha Longding.
U Gumja u la pynshai ba kata ka kali kaba lap ïa ka pisa kam dei satia kaba wan lang bad ka kali jong u Myntri Rangbah ka Meghalaya uba dei ban leit sha ka jingïalang ïalap ilekshon ha Longding.
Haba jubab ïa ki jingkylli, u SP u la ong ba ïa ka pisa kaba lap na kata ka kali la tohkit bad pyni ba kata ka kali ka dei jong ka kompani kaba pyntrei ïa ki projek bad kata ka pisa ka dei na ka bynta ban siew ïa ki nongtrei.
U Gumja u la ong ba ka bynta jong ka kynhun ka long ban kurup bad ïa ka jingtohkit yn sa leh shuh shuh da ka tnat Income Tax namarba ka kyndon kam shah ban rah pisa palat ` 50,000 ha kane ka por ilekshon na ka daw ba ka long kum ka jingpynkheiñ ïa ka Model Code of Conduct.
Ha kawei pat ka khubor la ïathuh ba kane ka pisa kaba la kurup ka dei jong uwei u briew uba hakhmat eh jong ka kompani Badri Rai kaba ju pyntrei ruh ïa ki projek ha Meghalaya.
U SP ka Longding u la ong ba ka kali ka dei jong uwei u briew uba kyrteng u Harshavardhan Singh uba bat kum u Executive Director ka kompani Badri Rai.
La ong ba ka kali kam dei kaba bud lang ïa ka kynhun ki kali kiba bud ïa u Myntri Rangbah ka Meghalaya hynrei kane ka kali ruh ka la bud lang.
Ka kali ka dei ka Fortuner kaba don ïa u nombar AS-01-ET-5252.
Lah ban kdew ba ka ilekshon MP bad MLA ha Arunachal Pradesh ka long ha kajuh ka por, bad na ka liang u Conrad, uba dei ruh u National President ka National People’s Party (NPP), u la leit sha katei ka jylla mynta ka sngi ban ïalap ilekshon na ka bynta ki kyrtong MLA ka seng. Mynta ka sngi, u Conrad u la don ha Longding ban pan jingkyrshan na ki paidbah na ka bynta ki kyrtong jong ka NPP.
Hynrei, ka NPP ka khlem pynïeng kyrtong na ka bynta ka ilekshon MP ha ki artylli ki konstitwensi ha Arunachal bad ka la rai ban ai jingkyrshan ïa ki kyrtong ba la pynïakhun da ka BJP.
Ha ka khubor na ka United News of India (UNI), u SP ka Longding u la ong ba la kurup ïa katei ka pisa kaba `1 klur na Kanubari Check Post, Longding na ka kali Fortuner kaba don ïa u nombor AS 01ET 5252 kaba dei jong u Harshvardhan Singh.
“Mynta, ïa kane ka pisa, yn sa tohkit da ka tnat Income Tax, bad hadien kata, yn sa leh ïa kaba donkam katkum ki kyndon (SOP),” la ong u SP.
Ki jingtohkit ba dang sdang ki ïathuh ba ïa katei ka pisa la mang ban siew na ka bynta ki nongbylla da ka Badri Rai and Company. La ong ba kane ka kompani ka don ki jingtei ha ki lai tylli ki jaka ha ka thaiñ ba kynthup ïa ka Sonari Medical College, Assam, Brigade Headquarters, Khonsa (Arunachal Pradesh), bad Assam Police Battalion, Sivsagar.
