Jowai, Ïaïong 4
Ka ïingbishar District & Session Judge jong ka West Jaiñtia Hills ka la rai pynshitom da kaba set patok shi jingim ryngkat ka kuna ïa ar ngut ki briew kiba donkti ha ka kam pynïap briew.
Kine ar ngut kiba la shah rai set patok shi jingim, ki dei u Salbinal Nangbah bad Belting Tyngkra na ka shnong Mynkrem.
Katkum ka khubor na u Superintendent of Police (SP) ka West Jaiñtia Hills District, la ong ba ïa ka ejahar (FIR) la ujor ha Nartiang PIC ha ka 6 tarik Jymmang 2014 kaba kynnoh ba u Prodic Nangbah u la shah pynïap dusmon ha lai ngut ki briew kiba tip kyrteng kum u Chalbinal Nangbah, Salbinal Nangbah bad Belting Tyngkra.
Ïa ka case la pynrung kyrteng hapoh thanat Jowai katkum ka No. 120(5)14 U/S 302/34 IPC, kaba la tohkit da u SI C Lamare.
Hadien bun snem, ka ïingbishar jong ka District ha ka 3 tarik Ïaïong 2024 ka la rai pynrem da kaba set patok shirta jingim ïa u Salbinal Nangbah bad Belting Tyngkra kiba na ka shnong Mynkrem bad daiñ kuna mar T.5,000 (San Hajar Tyngka) halor ka jingpynïap ïa u Prodic Nangbah uba na ka shnong Mynkrem kaba la jia ha u bnai Jymmang 2014.
Hynrei katba dang ïaid ka jingbishar, uwei napdeng kiba shah kynnoh u Chalbinal Nangbah, u la khlad noh ha ka 6 tarik Ïaïong 2017.
Ka ïingbishar ka la hukum ruh ban siew bai lutksan T.3 lak sha ki bahaïing jong u (L) Prodic Nangbah uba dei lanot ba shah pynïap.
