New Delhi, ïaïong:
U MP jong ka seng Aam Aadmi Party u Sanjay Singh uba la shahkem ha ka Enforcement Directorate (ED) ha u bnai Risaw mynshem snem bad uba la shah pyllait na Tihar Jail ha ka janmiet Sngi Balang hadien ba la rai ban pyllait jamin ïa u ha ka Sngi Ba-ar da ka Supreme Court ha kaba ïadei bad ka jingshah kynnoh donkti ha ka kam bamsap kaba la mih na ka jingpyndkoh treikam hapoh ka tnat Excise ha Delhi, u la pyntikna da kaba ong ba u Myntri Rangbah jong ka Delhi u Arvind Kejriwal un sa trei ïa ka kam ban shakri na ka bynta ki paidbah na patok.
“U Arvind Kejriwal un ym iehnohkam bad un bteng ban trei ïa ka kam napoh patok na ka bynta 2 klur ngut ki briew jong ka Delhi. La ong ba kumno yn lah ban thoh ïa ka shithi…Nga la la wanphai biang hadien ba nga la pynlut 6 bnai ha patok. La don ka jingai jingbit ba uno-uno uba shah set patok u lah ban thoh ïa ki shithi haba u don ha patok…Lada don mano- mano kiba kwah ban thoh ïa ka shithi sorkar, kata la donkam ban pan jingbit na ka ïingbishar,” la ong u Singh ha ka shlem treikam jong ka seng hadien ba u la shah pyllait jamin.
U Arvind Kejriwal ïa mynta u dang shah set patok ha Tihar Jail kaba don ha ka nongbah haduh ka 15 tarik, Ïaïong.
Ka Rouse Avenue Court ha Delhi ka la nang pynjlan shuh shuh ha kaba ïadei bad ka jingset patok ïa u ha ka 1 tarik, Ïaïong.
Ka Delhi High Court ka la buh ban bishar bniah halor ka jingmudui jong u Myntri Rangbah ban pyrshah halor ka jingshahkem jong u.
Ka ïingbishar ka la dawa ïa ka jingai jubab jong ka Enforcement Directorate ha kaba ïadei bad kane ka bynta.
“Nga kwah ban ong ba ka seng AAP ka la mih na ka jingïakhih. Ngim don jingtieng ïa kaei kaei ruh,” la ong shuh shuh u Singh.
“Ka la don ka jingpyrshah kaba jur ha baroh kawei ka ri, bad baroh ki ai ka jingkyrshan na ka bynta u Myntri Rangbah u Kejriwal,” u la bynrap. Hadien ba u la shah pyllait jamin, u Singh u la ong, “Kane ka dei ka por jong ka jingïaleh. Ki heh nongïalam jong ka seng jong ngi kiba kynthup ïa u Arvind Kejriwal, u Manish Sisodia bad u Satyendar Jain – ki la shah set patok. Nga don ka jingsngewskhem ban ong ba shisien ka sngi ki tala jong kine ki along kin sa plie bad kine kin sa lah ban mih. Dei na kane nga kwah ban ong ba mynta kam dei ka por ba ngin leh sngewbha, kane ka dei ka por jong ka jingïaleh,” la bynrap shuh shuh u Singh.
