Shillong, Ïaïong 04
U Igor Stimac un ïai bteng ban shimti kum u coach ka kynhun ïalehkai phutbol ka ri India na ka bynta ar tylli ki jingïakhun jong wat ba ar jong ka lympung ïaknieh rung FIFA World Cup pyrshah ïa ka Kuwait bad ka Qatar.
Kane ka la wan hadien ba ka All India Football Federation (AIFF) ka la kyntu ïa utei u coach ba un pynleit jingmut shwa na ka bynta kitei ar tylli ki jingïalehkai hadien ba ka technical committee ba la khlieh da u khlur ïalehkai phutbol barim u I.M Vijayan, ka la mynjur ban weng noh ïa utei u rangïalehkai World Cup barim na Croatia na ka daw ba ka India ka la shah rem ha ka Afghanistan ha ka jingïalehkai ba la dep ha la ïing kaba la long ha Guwahati ha ka 26 tarik u Lber.
Ka komiti kaba kynthup lang ïa u President ka AIFF u Kalyan Chaubey bad la khmih da u vice-president u N.A Haris, hadien ka jingshah rem ha ka Afghanistan, ka la shong jingïalang bad u Stimac lyngba ka video conference ha ka Sngi Ba-ar.
U Vijayan, uba long u dkhot ka executive committee jong ka AIFF bad kum u shongknor ka technical committee, u la ong: “Nga sngewkmen ba ngi la ïoh ban ïamir jingmut lang bad utei u coach. Ha ka World Cup qualifiers ngi dangsah sa ar tylli ki jingïalehkai bad ngi dang don jingkyrmen ban ïoh rung sha ka wat kaba lai ha ka sien kaba nyngkong eh.”
“Ka long ka por kaba ngin hap ban pynleit jingmut bha na ka bynta kine ki ar tylli ki jingïakhun ki ban wan bad ban pynkhlaiñ bha ïa ka kynhun khnang ba kan lah ban ïalehkai bha.”
Ha katei ka jingïalang, u Stimac u la shah pan jubab halor ka jingpynpaw ka jong u shwa ka jingïakhun pyrshah ïa ka Afghanistan kaba la long ha la ïing, ha kaba u la ong ba un mih noh lada ka India kam shym la lah ban ïoh rung sha ka wat kaba lai jong kane ka lympung ïaknieh.
“Ha u snem ba la lah, nga la ong ba ngin pyrshang ban ïoh rung sha ka wat kaba lai bad mynta ngi dangdon ha ka kyrdan ba-ar jong ka group-A bad tang ar tylli ki kynhun ki ban ïoh rung. Ngi la iamir jingmut lang halor kane ka mat hashwa ban wan ka jingïakhun pyrshah ïa ka Kuwait ka ban long ha ka 6 tarik u Jylliew 2024,” la ong u Stimac ha katei ka jingïalang.
Kham hashwa u Stimac u la ong ba ka jingmih na ka jingïakhun pyrshah ïa ka Kuwait bad Qatar ha u Jylliew kan pynpaw shai kdar halor ka kynhun ïalehkai ka ri la ka lah ne em ban ïoh rung sha ka wat kaba lai jong kane ka lympung ïaknieh rung World Cup (Qualifiers).
U la ong ruh ba ka jingïalehkai pyrshah ïa ka Kuwait ha ka 6 tarik u Jylliew kan long ka sngi kaba khraw ia ka phutbol jong ka ri, ha kaba la ka lah ban khur ïa ka jingjop kan ïoh rung sha ka wat kaba lai ha ka sien kaba nyngkong eh.
“Ki nongkitkam bad kumjuh ki rangïalehkai ki la tip bha ïa katei ka sngi ka ban pynsah kynmaw ïa ngi lang baroh bad ngin hap ban ïaleh katba lah ban pynurlong ïa ka jingjop,” la bynrap u coach.
“Ka jingïalang bad ki dkhot jong ka AIFF ka long kaba seisoh. Nga sngewkmen halor kane ka jingshim khia da baroh na ka bynta ban pynurlong ïa ka thong ha u Jylliew,” la bynrap u Stimac, ïa kaba ka kontrak jong u la pynjlan haduh u 2026.
Ka India kan ïakhun pyrshah ïa ka Kuwait ha Salt Lake stadium kaba ha Kolkata ha ka 6 tarik u Jylliew bad ka jingïalehkai shabar na la ïing pyrshah ïa ka Qatar kan long ha ka 11 tarik u Jylliew.
