Shillong, Ïaïong 05
Ka shlem treikam u District Sports Officer (DSO) East Khasi Hills kan pynlong ïa ka District Level Inter School Athletic Meet 2024 naduh 24 haduh 26 tarik mynta u bnai ha SAI Training Centre, Shillong.
Ha kane ka lympung la phiah sha lai tylli ki kyrdan ïalehkai kata ka Under-14, Under-16 bad Under-18 jong ki khynnah shynrang bad kynthei. Kane ka shlem ka la shah ruh ïa ki samla pule kolej kiba dang hapoh 18 snem ka rta ba kin ïashim bynta.
Ki jingïalehkai jong ki khynnah U-18 ki kynthup ïa ka 100M, 200M, 400M, 800M, 1500M, 3000M, Long Jump, High Jump, Shot Put(5.00Kg), Discus Throw (1.5Kg), Javelin Throw (700 gms) bad Medley Relay.
Ha ka U-16 ki long ka 100M, 300M, 800M, 2000M, Long Jump, High Jump, Shot Put (4.00Kg), Discus Throw (1.25Kg), Javelin Throw (600 gms), Medley Relay, Hexathlon (100M, Long Jump, Shot Put (4.00Kg), High Jump, Javelin Throw (600gms) bad 1000M). Katba ha ka U-14 ki long ka 60M, 600M, Long Jump, High Jump, Shot Put (3.00Kg) bad Kids Javelin Throw (300gms).
Kat kum ka kyrwoh ba la pyllait da u DSO Bah O. Mawthoh, la ong ba ka tarik kaba khatduh na ka bynta ki skul ban pynpoi ïa ki form kin long ha lane shwa ka 16 tarik mynta u bnai.
