Shillong, Ïaïong 05
Ka Spartan CC ka la pynliem noh ïa ka Meghalaya Police (MLP) da 6 wiket ha ka lympung ïalehkai Super Division Cricket League 2024 ba la pynïaid da ka Shillong Cricket Association ha ka Sngi Thohdieng.
Ha kane ka jingïakhun kaba la long ha madan Polo, ka MLP ka la kam trai ban tied nyngkong bad ka la kamai tang 80 run bad shah pynhap 10 wiket ha ki 22.2 over. U Ranjit Roy u la tied 24 run na ki 56 bol bad u Kumar Sewa u la ïoh 15 run na ki 20 bol. Katba u Supriyo Chanda u la shim 3 wiket bad 2 wiket da u Lakhan Singh.
Haba wan shimti ïa ka pali kaba ar, ka Spartan ka la lah ban kynjoh sha ka thong ha ki 18.3 over ha kaba ka la kamai 81 run bad shah pynhap 4 wiket. U Supriyo Chanda u la tied 23 run na ki 23 bol bad u Dipankar Barua u la ïoh 20 run na ki 25 bol. Katba u Morningstar Khongwir u la shim 3 wiket bad 1 wiket da u Pankaj Roy. Ïa ka nam Player of the Match la khur da u Supriyo Chanda.
