Shillong, Ïaïong 05
Ka Voice of the People Party (VPP) ha ka Sngi Thohdieng ka la pyllait paidbah ïa ka Mang Treikam jong ka seng na bynta ka ilekshon ban wan sha ka Lok Sabha.
Ïa kane ka Mang Treikam la pyllait da u Vice-President ka seng, Dr. Kara H. Shen ha ryngkat ka jingdonlang u nongaiktien, Dr. Batskhem Myrboh, nalor kiwei-kiwei ki nongïalam ba hakhmat jong ka VPP.
Haba ai jingkren ha kane ka sngi, u nongïalam ka seng, Dr. Rusievan Shangpliang u la ong ba ki mat kiba ka seng kan rah bad pynsngew kin kynthup ïa ka jingmanbha ha ka synshar-khadar, ka synshar paidbah, ka jinglaitluid ban mane Blei, ka jinglah ban ïa im lang hapdeng ki jaidbynriew bapher-bapher, ka pule-puthi nalor kiwei-kiwei.
“Ngin rah ruh ïa ka mat halor ka Article 371 bad ka Khyrnit ba 6, ka mat treikam ha ki khappud, tnad pynmih bording, ka rep ka riang, ka mariang, bad ka jingïakajia pud bad ka Assam,” la ong u Dr. Shangpliang.
U la ong ba ka seng kan rah ruh ïa ka mat ba ïadei bad ka bhah thung kam ha ki ophis treikam ka Sorkar Pdeng bad kan kyrpad ïa ka jingtuklar ka Sorkar Pdeng halor ka jingkynrei u drok.
“Ngin ïeng pyrshah ïa ka jingpyntreikam ïa ka CAA, ka UCC ba la wanrah da ka Sorkar BJP. Ngin ïai ban ruh halor ka jingpynrung ïa ka ktien Khasi ha ka Khyrnit ba 8, ka ILP, ka jingpynbha ïa ka tnad ka koit ka khiah, ka jingpynbna ïa ki surok bad ki lad pynïasoh lyngba ki kor teknoliji,” u la ong.
Shuh shuh u Dr. Shangpliang u la bynrap ba ka seng kan pynsngew ruh ïa ka mat ha ka ban kyntiew kyrdan ïa ki jingdon-jingem ha ki kad liengsuiñ, ban pyrshah ïa ka jingtih ‘Uranium’ hapoh ka Jylla bad ka jingpyrshah ïa ka jingwanrah lynti rel khamtam ha Ri-lum Khasi-Jaiñtia.
“Ngin kren ruh na bynta ki hok jong ki briew ba don jingduna ha ki dkhot met, ban pyntikna ïa ka jingïaid beit ïaid ryntih jong ka jingtreikam ki skhim ba la kyrshan da ka Sorkar Pdeng bad ban pynsngew na bynta ki jingdonkam ha ka liang ki jingdon-jingem ha ki kam ïalehkai,” la ong utei u nongïalam.
