Shillong, Ïaïong 05
Ka Mohammedan Sporting ka donkam sa tang shi point na ka bynta ban rah syndon ïa ka nam lahduh ha ka lympung ïalehkai I-League mynta ka aïom. Kane ka kynhun kaba na Kolkata kan ïakhun pyrshah ïa ka Shillong Lajong FC mynta ka sngi Saitjaiñ ha SSA Stadium, Polo ha ka por 7 baje janmiet.
Ka Mohammedan kaba la bat ïa ka kyrdan ba hakhlieh jong kane ka lympung da kaba ka la tam haduh 5 point ïa ka Sreenidi Deccan; kaba la ïakhaid mar 1-1 kol pyrshah ïa ka Neroca FC ha ka Sngi Palei ha kane ka nongbah.
Kumta kane ka jingïakhun ka lah ban long kaba kongsan ïa ka Shillong Lajong hapoh ka jingïalam u Bah Bobby L. Nonbet (coach) namar ka la shu ïai sah ha kajuh ka kyrdan kaba hynriew hadien ki jingshah rem bad ki jingïakhaid ha ki jingïakhun ba la dep.
Kumba ka long mynta ka Mohammedan ka dei ka kynhun kaba khlaiñ bor ha kane ka lympung ha kaba ka la ïoh ban lamkhmat da kaba kamai 49 point na ki khatar sien ïakhun bad ka la tam haduh 18 point ïa ka Lajong.
Lah ban pynkynmaw ha ka wat kaba nyngkong kaba la long ha Kolkata, kine ki kynhun ki la ïakhaid mar 1-1 kol. Dangshen ha ka jingïalehkai ba la dep, ka Lajong ka la shah rem ha ka Delhi FC da 3-1 kol.
