Jowai, Ïaïong 05
U MLA jong ka Congress na Mawhati konstitwensi, u Bah Charles Marngar, u la ong ba ka ilekshon MP kaba mynta ka dei na bynta ka jingïada na ki jingthmu barieh jong ka BJP ym na bynta ka roi ka par.
U Bah Marngar u la pynpaw ïa la ka jingsngewkhia ha ka jingïalang ïalap ilekshon na ka bynta u kyrtong jong ka Congress, u Bah Vincent H Pala, ha Ïawmusiang, Jowai ha ka Sngi Thohdieng.
U Bah Marngar u la pynkynmaw ba ha ka por ka jingsynshar ka Congress, ki nongshong shnong ki don ki jinglaitluid kiba bun jait, naduh ka riam ka beit, ka ktien ka thylliej, riti dustur bad ka niam ka rukom.
U la ïathuh ba ki kam pynroi jong ka Congress ki long naduh ki surokbah, ka NEHU, NEIGRIHMS, ka skhim 100 sngi, skhim bai bam tymmen, ka Smart Card bad kiwei.
Nalorkata, utei u MLA u la ong ba ka jingsynshar ka Congress, ka pisa dewïong ka wan sha ka pla jong ka sorkar bad na kane ka pisa dewïong la ïarap sha ki skul, hospital bad sha kiba duk. “Dei tang lada ka seng Congress kan wan ha ka bor, ngi ki baduk basuk ngin ïoh ïa ka jingkyrkhu, kumta ai ka jingkyrshan ïa u Ma Pala,” u la kyntu.
Kane ka ilekshon kam dei na ka bynta ka roi ka par hynrei ka dei na ka bynta ban ïada ïa ka jaitbynriew. “Hapoh ka Constituency ka jong nga, nga la ong ïa ki paidbah ba kim dei ban kwah ïa ka roi ka par na ka bynta kane ka kynti kaba mynta. Nga kum u MLA ngan ai ïa phi ka roi ka par katba lah na ka MLA skhim ka jong nga, hynrei na ka bynta ka ilekshon MP ngi donkam ïa ka jingïada,” la ong u Bah Marngar. Ha kaba ïadei bad u Bah Vincent, u la ong ba u la long MP la 15 snem hynrei bun bah ki jingkynthoh, ki jingkylli pyrshah ïa u, ki jingkdew kti bad kylli ban ong hato u la leh aiu, hynrei ki klet pat ba u dei u MP uba la ïoh ban kren bunsien tam hapoh Parliament napdeng ki MP na ka thaiñ shatei lam mihngi.
“U Ma Vincent u la dep ban kren hapoh Parliament na ka bynta ka jingeh ki paidbah bad ïa kane lah ban pynshisha lyngba ki record kynthup naduh ka ILP, ban pynrung ïa ka ktien Khasi hapoh ka khyrnit kaba phra, ki jingeh ki thaiñ khappud nalor kiwei,” u la ong.
Ha kaba ïadei bad ki kam pynroi hapoh ka jylla, utei u MLA u la ong ba dei lyngba ka jingïasaid jong u Bah Vincent ba la ïoh ïa ki surok bah kynthup naduh ka Shillong-Tura, Shillong-Guwahati bypass, Jowai bypass kumjuh ka Shillong bypass, Shillong-Dawki, Nongstoiñ-Rambrai, Nongstoiñ-Ranikor.
Ha kaba ïadei bad ka MP Skhim, u Bah Marngar u pynpaw ka jingsngewnguh ïa u Bah Vincent namar la 15 tylli ki snem ka jinglong jong u kum u MP ha kylleng ki shnong ka jylla la don ki dak ki shin jong u.
U la kyntu ruh ïa ki paidbah ba shwa ba kin kyrshan dei ban bishar bha ïoh dei ki kyrtong kiba la rung bun tylli ki ïing, hynrei u Bah Vincent tang kawei ka ïing bad kata ka dei ka seng Congress.
“Wat ngeit ïa kane ka sorkar kaba la dep shukor ïa u paidbah bad 5 snem mynshwa ka la ong ba ym don trok kit dewïong, hynrei man ka miet ki pyllait trok dewïong bad lum da ki spah klur tyngka bad kane ka pisa ka leit sha ki heh jong kane ka sorkar.”
Haba kynthoh halor ka jingbat ïa ka pisa ha Arunachal Pradesh ha ka Sngi Palei, u Bah Marngar u la ong, “Ka pisa jong ka jylla Meghalaya la rah sha Arunachal namar ki don ki kyrtong jong ka NPP sha katei ka jylla.”
Kane ka sorkar ba ïalam da ka NPP, ka la kob ba dei tang ma ka kaba shim ïa ka jingkitkhlieh pynbeit pud pynbeit sam bad kynnoh ruh ba ka Congress kaba synshar da ki phew snem kam lah ban leh ïa kane. U la pynshai ba ka Congress kam treh ban pynbeit pud pynbeit sam kyrkieh namar ba kam kwah ba shi inshi ka jaka jong ki paidbah kan leit sha ka Assam katba kane ka sorkar MDA ka kloi ban pynbeit pud pynbeit sam bad ki khyndew ki shyiap ki leit sha Assam. U Bah Vincent, ha ka jingkren u la ong, ka jingthmu jong u ha kane ka ilekshon MP ha kane ka kynti ka long ban wanrah ïa ka roi ka par bad ka jingkiew jong ka jylla ka dei ka thong ba ha khlieh duh bad ban pynthikna ban bteng ban kyntiew ïa ki lad ki lynti ha kaba ïa dei bad ka koit ka khiah, ka umbam umdih kaba khuid, ban kyntiew ïa ki skul bad ki lad ïoh kam ïoh jam nalor kiwei kiwei.
Ha kaba ïadei bad u synñiang jong ka seng Congress hapoh ka jylla u la ong ba la ïoh ban pyntreikam ïa bun tylli ki project la ha ka liang ki lynti ki syngkien bad ki surok bah, ki jaka khaïi-pateng sha ki thaiñ, ki jaka jong ka kad liengsuiñ, jaka pule puthi bad kiwei.
Ha kaba ïadei bad ki mat treikam jong ka Congress na ka bynta kine ki san snem u la ong ka thong ka long ban ïarap ïa ki nongrep bad ka jingmyntoi jong ki nongrep, ka lad ïoh kam ïoh jam, ban pynrung ïa ka ktien Khasi hapoh ka Khyrnit Ba Phra, ban ïada ïa ka hok ki khynnah, ka hok ki riew rit paid, ka jingkhuid jingsuba ha ka liang ka synshar-khadar, ka jingpynskhem ïa ka nongsngi jong ki bylla nalor kiwei kiwei. U la kynthoh ruh ïa ka BJP kaba la pyntreikam ïa ka aiñ CAA bad kumjuh ka jingkwah ban wanrah ïa ka UCC kaba ktah ïa ka riti dustur, jinghiar pateng, shongkha- shongman. U la ong ba ka BJP ka kwah ban ïuhroit katba dei tang ka Congress hi kaba ai ka jingshngaiñ bad ka jinghun sha baroh ki nongshong shnong hapoh ka ri.
