Imphal, ïaïong:
Shwa ban pynlong ïa ka ilekshon Lok Sabha ha Manipur, ki shipai jong ka sorkar kmie bad jylla ki la pynkhlaiñ ïa ka jingpyntreikam bad ka jingleit khynra sha kiba bun ki jaka. Ha kane ka jingpyntreikam la ïoh ban kurup ïa kiba bun ki tiar siat, ki kuli ïasiat, ki tiar pynbthei bad ki tiar ba ju pyndonkam ha ki jinghiar thma na ki bynta jong ka thaiñ Churachandpur, la ïathuh ka tyllong khubor ba la wan na ki heh pulit ha ka sngi Palei.
Na ka jingïoh jingtip ba la phah da ki nongwad bniah la tip ba ki la don ki tiar siat ha ka shnong Bungjang kaba don ha Churachandpur distrik jong ka Manipur, ka kynhun ba la ïatreilang hapdeng ki shipai ka tnat Assam Rifles bad ki pulit ka Manipur ki la pynlong ïa ka jingleit khynra ha ka sngi Balang.
Kane ka jingpyntreikam ka la long kaba seisoh da ka jingïoh ban kurup ïa 14 tylli ki tiar siat, kynthup kawei ka .32 mm pistol, kawei ka .22 mm pistol, 11 tylli ki suloi shi ktang bad uwei u 51mm Mortar, ha ryngkat kiwei pat ki tiar siat. Ïa kine ki tiar siat ba la ïoh ban kurup la phah sha ki pulit jong ka Manipur na ka bynta ban leh ïa kaba donkam.
