Nongpoh, Ïaïong:
Da ki spah ngut ki paidbah ki la mih ban leit sngap ïa ki jingpynshai paidbah na ki nongïalam ka Voice of the Peoples Party (VPP) ha ka jingïalang ba la pynlong ha Nongpoh ha ka Sngi Palei.
Ka VPP ha kane ka jingïalang ka la pan jingkyrshan na ki paidbah ban kyrshan pura ïa u kyrtong ka seng, u Dr. Ricky AJ Syngkon ha ka ilekshon MP ka ban long ha ka 19 tarik mynta u bnai.
Ha kane ka sngi, nalor u kyrtong ka VPP, la ïadon lang u President ka VPP Bah Ardent Miller Basaïawmoit lem bad kiwei kiwei ki nongïalam.
Haba kren ha kane ka sngi, u Dr. Ricky AJ Syngkon u la ong ba ka dawbah kaba la pynlong ïa u lem bad ka VPP ban mih shakhmat ban ïakhun ïa ka ilekshon MP ka dei namar um lah shuh ban sngap ïa ka jingud jingnam jong ki paidbah namar ka jinglong-jingman ha ka jylla kaba la isangsot ban peit ïa ka jinglong-jingman kat shaba phai, tang ki jingduna bad jingdkoh suda bad shisien peit i kumba ym lah shuh ban khlieh bad dei halor kata ka nongrim ba ka VPP ka la mih pyrthei ban pynim, pynbha bad pynkylla dur pat ïa kane ka jaidbynriew bad ka jylla.
U la ong ruh ba dei tang u nonghikai u bym pat ju don bynta ha ka kam saiñ hima sima, bad kum u nonghikai haba u peit ïa ki khun samla kiba long ka lawei jong ka Ri bad ka Jaidbynriew ki dap da ka durkhmat kaba dum, ka durkhmat ka bym don jingkyrmen da kaba ong ruh ba ki samla pule ki ju ïathuh ba kane ka pyrthei kaba dap tang da ka jingduh lad suda kat shaba phai bad ba kum u nonghikai, ka dei ka kamram ka jong u ban wad ïa ki dawbah bad kawei na kita ki dawbah, ka dei ka jingbym biang ha ka synshar ka khaddar.
U la ong ruh ba la donkam ban don ïa ka synshar khadar kaba don ïa ka jingkitkhlieh, ka jingïohi jngai ban saiñdur na ka bynta ka lashai, ka bym don ïa ka jingleh shilliang khmat, kaba pyndonkam hok ïa kata ka iktiar ka bor na ka bynta ka jingkyrkhu ïa kita kiba duna, kiba tlot ban ïarap ban kyntiew ïa ki bad kata ka dei kaba ma u, kum u kyrtong u ban aireng ha kane ka ilekshon u ïohi bad sngewthuh ïa ka jingmut jong ka synshar ka khadar.
U Dr Ricky AJ Syngkon u la ong ruh ba kum u briew uba don ïa ka jingkitkhlieh, um lah satia ban sngap, ban shah bad ban shu peit ïa ka jingjot ka jingmong bad ka jinghiar arsut jong ka jylla da kaba ong kum ka jylla ha kine ki 50 tylli ki snem jong ka jingïaid lynti.
“Ngim tip shano ngin poi bad haba ngim tip shano ngin poi, ka don ka jingma namar ki nongïalam kiba mynta kim don satia ïa ka jingïohi jngai,” u la ong bad bynrap ruh ba tang sanphew tylli ki snem jong ka jingïaid lynti, i kumba ka jylla kan jah rngai bad pynpaw ïa ka jingsngew sarong ba ki nongïalam jong ka VPP ki don ïa kata ka jingïohi jngai ban pynim, pynbha bad pynkylla dur pat ïa kane ka jylla.
