Lucknow, ïaïong:
Ka kynhun Uttar Pradesh Anti-Terrorist Squad (ATS) ha ka sngi Palei ka la kem najan khappud Nepal ïa lai ngut ki briew kiba la shah pynshisha ba ki la thmu ban leh ïa ki kam pyntriem ha kane ka ri, la ïathuh ki heh ka kynhun.
Kine ki lai ngut ki briew ki kynthup ïa ar ngut kiba dei ki nongshong shnong jong ka Pakistan bad ki la pyndonkam da ki sakhi thok ba ki dei ki nong India, la ong ka jingthoh ba la phah da ki heh ka kynhun ATS.
“Kum shi bynta ban pyntreikam hadien ka jingïoh jingtip ba don katto katne ngut ki lehnoh kiba la thmu ban leh ïa ki kam thombor ha kane ka ri ha kaba kine ki dang ïaid lynti ha ki bynta khappud jong ka Nepal, ka kynhun ATS jong ka Gorakhpur ka la pynlong ïa ka jingpynap shrip. Kane ka kynhun ha ka sngi Palei ka la kem ïa kine ki lai ngut kiba la ïaid lyngba ka khappud Nepal ban wan rung ha kane ka ri halor ka jingthmu jong ki ban leh ïa ki kam thombor,” la ong ka jingthoh ba la phah.
Ïa kine kiba la shah kem la tip kyrteng kum u Mohammad Altaf Bhatt, uba dei u nongshong shnong jong ka Rawalpindi kaba don ha Pakistan, u Sayyed Gajnafar, u nongshong shnong jong ka Islamabad bad u Nasir Ali, u nongshong shnong jong ka Jammu & Kashmir, ka la ong.
Kine ki lai ngut ki la shahkem ha ka khappud Indo-Nepal ha Sonauli kaba don ha Maharajganj distrik, la ïathuh shuh shuh ka jingthoh.
U Altaf Bhatt u la ïakynduh bad u Gajnafar ha Kathmandu ha kaba kine ki la shna bad pynïoh da ki kot sakhi thok ban pynshisha ba ki dei ki nong India kynthup ki Adhaar Cards.
Hadien kane ki la ïakynduh ïa u Ali uba la ai buit ban phah ïa u Bhatt bad ïa u Gajmafar sha Kashmir lyngba ka khappud Indo-Nepal, la ong ka jingthoh.
“U Mohammad Altaf Bhatt u la ïathuh ha ki heh ka kynhun ATS ba u la ïoh jinghikai pyntbit ha ka ktem jong ki lehnoh Hizbul Mujahideen jong ka Muzaffarabad ha ryngkat ka jingai jingkyrshan jong ka kynhun syntiat halor ka jingthmu ba kin pynlait luid ïa ka Kashmir na India. U Bhatt u la thmu ban leit sha Jammu & Kashmir da ka hukum jong ka kynhun syntiat na ka bynta ban leh ïa ki kam pyntriem,” la ong ka jingthoh.
Ka kynhun ATS ka la ïoh ban kurup ïa ki kot sakhi thok jong kine kiba la shah kem kiba la pynshisha ba ki dei ki nong India, ïa ki jingthoh bad ki kot sakhi ba ki long ki nong Pakistan bad ïa ki Passport na ka jaka ba ki wan, la ïathuh ki heh jong ka kynhun tohkit.
Ka la don ka jingujor ejahar ba la buh hapoh ka jingtreikam jong ki kyndon 420, 120B, 121A jong ka Indian Penal Code. Ka jingtohkit ha kaba ïadei bad kane ka jingjia ka dang ïaid shakhmat, ki la ong.
