Tehran, Iaïong:
Katkum ki khubor la ong ba ki lehnoh Jihadist ki la leit ban thombor ia ka thaiñ Shathie-mihngi jong ka Iran kaba don markhap bad ka Pakistan, ha kaba 10 ngut ki bor pahara jong ka Iran ki la duh ia ka jingim ha katei ka jingjia.
La ong ba ka jingshah thombor bad jingkhlad ki bor pahara ha u Nohprah mynshem snem ruh ka jur bha bad dei katei hi kajuh ka kynhun lehnoh kaba don kti ha katei kam thombor na ka por sha ka por.
Kitei ki kam thombor jong ki lehnoh Jihadist ki ju jia khah-khah ha ki thaiñ jong ka nongbah Sistan-Baluchistan, ha kaba da ki snem katei ka thaiñ ka long ka bym ju sangeh ban sakhi ia ki kam thombor naduh ki jingkhaïi drok be-aiñ bad ka jingiakynad para kynhun runar kiba dei na ka jaitbynriew Baluchi bad ki lehnoh ne ki kynhun runar jong ki jaitbynriew Sunni Muslim.
U Symbud Myntri kam pohiing- u Majid Mirahmadi haba iakren bad ki lad pathai khubor, u la pyntip ba 5 ngut ki bor pahara jong ka Islamic Revolutionary Guard Corps bad ki pulit kiba don ha katei ka jaka ki la duh ei ia ka jingim ha ka jingleit thombor jong kitei ki lehnoh ha ki ar miet ha ka jaka treikam jong ki bor pahara hapoh ka thaiñ Rask bad ha ka thanat pulit kaba don ha Chabahar.
U Mirahmadi u la iathuh ruh ba kitei ki lehnoh ki thmu ban leit kurup bad knieh hi ia katei ka jaka treikam jong ki bor pahara kaba don ha katei ka thaiñ. Nangta, u la iathuh ruh ba don napdeng kitei kiba khlad kiba ym long shuh bad ka jingkhlad kaba la ishyrkhei haduh katta namar katei ka kam thombor dusmon jong kitei ki lehnoh.
Hynrei, la ong ba kitei ki lehnoh ki leh mynleh kum ki nongwei bad kiba shu wan jngoh kai shipor hynrei khlem da pyntip ne ai ia ki jingtip kiba pura shaphang ka jingthmu bad jingleit-jingwan jong ki.
Ia katei ka kam thombor ha katei ka Sngi Palei, la shim jingkit khlieh da ki lehnoh Jaish al-Adl (kaba mut ‘Army of Justice’ ha ka ktien Arabic).
