Florida, Iaïong:
Ha kawei ka jingjia kaba sngewsih, la ong ba iwei i khyllung jong kawei ka longiing i la khlad noh na ka jingtyngkhuh kali kaba la jia ha United States, katba u hynmen ba 11 snem bad ki kmie-kpa jong itei i khyllung pat ki la mynsaw jur.
U kpa jong itei i khyllung u Kommareddy Susheel bad ka kmie ka Bommidi Anusha jong kitei 2 ngut, ki dei ki nongshong shnong trai na ka jylla Telangana hynrei ki trei kum ki ‘Software Developer’ hapoh United States.
La ong ba hadien katei ka jingjia tyngkhuh kali kaba sniewbok bad kaba la jia hapoh ka nongbah Florida jong ka United States, ia itei i khyllung la pynkit mar-mar sha ka hospital hapoh Tallahassee, hynrei la ong ba itei i khyllung i la khlad noh ha ka 2 tarik mynta u bnai (Iaiong) namar ka jingjur palat ka jingmynsaw na katei ka jingjia.
Kane ka la jia ha ka por katba kitei longiing ki dang leit phai sha iing na ka jaka sumar ba ki leit ban phah sumar ia u khun ba heh, uba la ithuh kum u -Advaith. Hynrei la ong ba ki la leit kum rat pat sa ia 2 tylli ki dieng katba katei ka kali kaba ki shong dang pyrshang ban tam ia kawei pat ka kali ha ka surokbah jong ka nongbah Florida ha katei ka sngi.
La ong ba kitei ki kmie-kpa bad u khun ba heh, ki la mynsaw bad shitom jur bha bad ia mynta ki dang don hapdeng ka jingsumar hapoh ka hospital ha Dothan jong ka nongbah Alabama. La iathuh ba utei u kpa bad u khun ba heh ki don ha ICU, katba ka kmie pat ka la kdiah ka shyieng kjat sha ka liang kadiang bad kumjuh ruh ki bynta jong ka dur khmat ki la pait na shapoh.
