Shillong, Ïaïong 05
Ka Hurdles CC na Maw-synram bad ka Cricket Lovers CC ki la jam sha ka final ha ka lympung ïalehkai 3rd District League T20 Cricket Tour -nament 2024 ba la pynïaid da ka East Khasi Hills Cricket Association.
Ha ka jingïakhun semi final kaba la long ha Shortimai Syiem Stadium kaba ha Smit, ka Hurdles CC ka la pynliem noh ïa ka Laitjem CC da 10 run. Ka Hurdles kaba la shimti ban tied nyngkong, ka la kamai 152 run bad shah pynhap 10 wiket ha ki 18.5 over. U Sandy Stone Kharshandi u la tied 40 run na ki 24 bol bad u Jonathan Pariong u la ïoh 39 run na ki 24 bol. Katba u Pynbhalang Kharsati u la shim 4 wiket bad 6 wiket da u Antony Pathaw.
Haba wan beh ïa ka thong, ka Laitjem ka la kamai tang 144 run bad shah pynhap 7 wiket ha ki 20 over. U Mebanshan Kharsati u la tied 24 run na ki 22 bol. Katba u Jonathan Pariong u la shim 2 wiket bad u la ïohpdiang ruh ïa ka khusnam Player of the Match.
Haba phai sha kawei pat ka jingïakhun kaba ar, ka Cricket Lovers CC ka la jop da 5 run ïa ka Nongdawah CC. Ka Cricket Lovers ka la kam trai ban tied nyngkong ha kaba ka la kamai 107 run bad shah pynhap 10 wiket ha ki 17.5 over. U Muksodul Chaudhary u la tied 27 run na ki 29 bol. Katba u Kyrmen-skhem Nongdawah u la shim 4 wiket.
Haba wan beh ïa ka thong ka Nongdawah ka la kamai rang 102 run bad shah pynhap 8 wiket ha ki 20 over. U Wankitlang Nongdawah u la tied 31 run bad shah pynhap 21 bol. Katba u Raj Kishor Yadav u la shim 3 wiket. Ïa ka nam Player of the Match la khur da u Muksodul Chaudhary.
Kumta ka Hurdles bad ka Cricket Lovers kin pynkhreh ban ïoh rah nam lahduh ha ka jingïakhun final ka ban long mynta ka Sngi Saitjaiñ.
