Shillong, Ïaïong 05
U khlur ïalap ilekshon uba tbit jong ka UDP na Sohïong Konstitwensi, Bah Amazing Kurbah, u la pynpaw ba u khlem jah na ka saiñ pyrthei hynrei u khlem mih shuh ban ïalap ilekshon ha kane ka MP Lok Sabha namar u la sngewngiah ïa ka jingïalehkai ‘drama’ ha ka saiñ pyrthei.
Ka jingleit wad u nongthoh khubor ïa u Bah Amazing Kurbah ka dei namar ki paidbah ha kine ki sngi ki la kylli shaei jah u Bah Amazing uba dei u samla uba tbit ban kren ha ka jingïalap ilekshon Sohïong haduh ban pynjop ïa u Bah Synshar Lyngdoh uba dei u pyrsa jong u MLA barim ka Sohïong Konstitwensi, Bah HDR Lyngdoh.
Haba ïakren kyrpang bad u Bah Amazing, u la pynshai ba ka jingkyrshan ïa ka UDP kam dei ba u ieid ïa kane ka seng hynrei u ieid ïa baroh ki seng ‘riewlum, hynrei ka la pynthait noh ïa u namar ka UDP ka la leit ban ïatreilang bad ka NPP mar shu kut ka ilekshon.
“Ka UDP mar shu kut ka ilekshon ka la leit ban ïatreilang bad ka NPP bad kane ka la eh than ban leit sha u paidbah hynrei da ka jingtrei shitom ngi la ïoh ban kheit ïa u soh ka jingjop” u la ong.
Nalor nangta, u la ïathuh ba kiba bun ki seng saiñ pyrthei ki la khot hynrei um treh ban leit ïano-ïano namar wat ïa ka seng UDP kaba u la kyrshan ha Sohïong ruh u khlem leit namar um kwah ban pynlong kamkai ïalade namar ha ïingdorbar ka UDP ka ïatreilang bad ka NPP bad ha KHADC ka UDP ka shong ha liang pyrshah bad ka NPP ka ïatreilang bad ka Congress.
Haba kylli balei u leit kyrshan ïa ka jingïakhih u Bah Ardent ha Additional Secretariat, u Bah Amazing u la ïathuh ba u leit ai jingkyrshan namar ka dei ka mat kaba ktah ïa ka jaidbynriew.
U la ïathuh ba ha ka ilekshon MLA ha u 2023 u la dep ai shi ‘vote’ ha ka UDP bad u kwah ban ïaineh shwa ha kane ka seng.
Haba pynkut ïa ka jingïakren, u Bah Amazing u la kyrpad ïa ki paidbah ba kin jied ïa ka seng ‘riewlum ha kane ka ilekshon MP Lok Sabha, kata kin rai ïa ka UDP ne VPP hynrei ki dei ban kyntait mardor ïa ka NPP ne Congress.
